Foto: primeminister.kz
«Otbasy bank» tóraǵasy Lázzat Ibragimova turǵyn úi jinaq bankin ekinshi deńgeili júieden shyǵarý sharasy nege kesheýildep jatqanyn túsindirdi, dep habarlaidy QazAqparat agenttigi.
«2021-2022 jyldary «Otbasy bank» ekinshi deńgeidegi bankter júiesinen shyǵarylyp, baspana naryǵyn damytý institýtyna ainalatyny aitylǵan bolatyn. Ol ideiadan ainyp qaldyńyzdar ma?», - dep surady BAQ ókili Májilistegi otyrystan keiin.
Bank tóraǵasy ol joba qazir Májilistiń qaraýynda ekenin aitady.
«Bul zań jobasy (Qazaqstan Respýblikasynyń keibir zańnamalyq aktilerine turǵyn úi saiasatyn ózgertý baǵytynda ózgertýler men túzetýler engizý týraly» - red.) qazir Májiliste jatyr. Biraq qazir onyń aktiv kólemi jáne jeke kapitalynyń kólemi boiynsha eldegi tórtinshi bankke ainalǵanyn eskersek, sheshimdi jan-jaqty tarazylap baryp qabyldaimyz. Bank Qarjy naryǵyn retteý jáne damytý agenttiginiń quzyrynda qalsyn, degendi jaqtaýshylar bar. Bul banktiń qyzmetin kóbirek baqylaýǵa múmkindik beredi. Ondai baqylaý kerek te. Ekinshi taraptan bank halyqtyń áleýmettik az qamtylǵan sanatyna kóbirek baǵdar ustasa degen usynys bar. Ondai jaǵdaida biýdjetten kóbirek aqsha bólinip, qyzmetinde erkindik paida bolar edi. Boryshkerlerdiń tólem qabiletin baǵalaý, kepil qoiý saiasaty sonshalyq qatań bolmaýshy edi. Sondyqtan bul másele áli talqylaý satysynda», - dedi bank basshysy.
Lázzat Ibragimova, tipti, «Otbasy bank» ekinshi deńgeidegi bankter júiesinen shyǵarylǵan kúnniń ózinde salymshylardyń depozitterine memleket kepildik beretinin atap ótti.
«Banktiń aktsioneri «Báiterek» ulttyq basqarý holdingi bolsa, «Báiterektiń» aktsioneri - Úkimet. Sonda Úkimettik deńgeidegi kepildik bar degen sóz. Sondyqtan bul máselede túbegeili sheshim qabyldanbaidy dep oilaimyn. Óitkeni bul - jańa model. Al jańa model árqashan aýyr enedi. Sondyqtan eski modelde qalǵan durys», - deidi Lázzat Ibragimova.
