Otbasy bank jaldaý aqysyn sýbsidiialaý ótinishterin Baspana market portalynda qabyldaidy, dep habarlaidy "Ult aqparat" banktiń baspasóz qyzmetine silteme jasap.
Otbasy bank qazaqstandyqtardyń turǵyn úidi jaldaý aqysyn sýbsidiialaýǵa qatysty onlain ótinimderin qabyldaý úshin platformanyń fýnktsionaldyǵyn pysyqtaýda. Jumys barysyn avtomattandyrý úshin bank 6 memlekettik organnyń 16 derekqorymen integratsiia jasaýy qajet. Sondyqtan baspanany jalǵa alý aqysyn sýbsidiialaý baǵdarlamasy 2022 jyldyń mamyr aiynan bastap iske qosylady.
Kóp balaly otbasylar, 1 jáne 2 toptaǵy múgedekter, jetim balalar, múmkindigi shekteýli balalardy tárbielep otyrǵan otbasylar jaldaý aqysyn sýbsidiialaýǵa ótinish tapsyra alady. Alaida úmitkerler turǵyn úi alý kezeginde turýlary qajet.
Olardyń árbir otbasy múshesine shaqqanda sońǵy 6 aidaǵy jiyntyq tabysy eń tómengi kúnkóris deńgeiiniń bir mólsherinen aspaýy tiis (2022 j. 1 KM – 36 018 teńge).
Mundai otbasylarǵa kómek retinde biýdjetten 50 milliard teńge bólinedi. Bul qarajatqa memleket 70 myń qazaqstandyqtyń baspanany jalǵa alý qunynyń jartysyn sýbsidiialaidy.
«Bul tizimdegilerdiń deni, 51 myńǵa jýyǵy, kóp balaly otbasylar. Taǵy 10 myńy - 1 jáne 2 toptaǵy múgedek jandar, 7 myńy - múmkindigi shekteýli balalar tárbielep otyrǵan az qamtylǵan otbasylar, 2 myńy - jetim balalar. Endi bul azamattar úshin baspana máselesi asa ótkir bolmaidy. Olar atalmysh baǵdarlama arqyly otbasylyq biýdjetke túsetin salmaqty azaitýǵa múmkindik alady. Únemdelgen qarajatty turmysty jaqsartýǵa baǵyttaýǵa bolady nemese jeńildetilgen nesie berý baǵdarlamalaryna qatysý úshin qarajat jinaqtaýǵa da múmkindik bar», - dep túsindirdi «Otbasy bank» AQ Basqarma tóraiymy Lázzat Ibragimova.
Baǵdarlamaǵa qatysatyn azamattardyń tizimin Indýstriia jáne infraqurylymdyq damý ministrligi qalyptastyrady. Ony alǵannan keiin Otbasy Bank atalmysh baǵyttyń operatory retinde jaldaý aqysyn sýbsidiialaý múmkindigi týraly tizimdegi azamattardy habarlandyrady. Izinshe úmitker bank filialyna kelmei-aq, Baspana market platformasy arqyly onlain ótinish bere alady.
Ol úshin qazaqstandyqtardyń ETsQ kilti bolýy qajet. Ótinish berýshiniń kirisi platformada tekserilgennen keiin ol ózine qolaily baspana taýyp, ony jalǵa alý shartyna onlain qol qoiyp, tirkeidi. Sodan keiin aǵymdaǵy shot ashyp, jalǵa alý qunynyń 50 paiyzyn sol jerge aýdarady. Bank óz tarapynan qalǵan 50 paiyzyn aýdaryp, jalǵa alýshynyń tólem tártibin odan ári qadaǵalaidy.
Úmitkerdiń jaldaý aqysyn sýbsidiialaýǵa onlain ótinish berý múmkindigi bolmasa, ol bul jumysty Otbasy bankiniń bólimshesinde óz-ózine qyzmet kórsetý aimaǵynda iske asyra alady.
