Memlekettiń ideologiiasyn qalyptastyryp júrgen azamattardyń, ózin sotsial-demokratiialyq dep ataityn partiia atynan sailanǵan depýtattardyń VLKSM-nyń simvoldary beinelengen úlken jiynda onyń ánderin shyrqap turýy, jumsaqtap aitsaq, memlekettiń bolmysyna, Qazaqstan Respýblikasyn qurýǵa negiz bolǵan qundylyqtarǵa qaishy.
Bul komsomoldyń, Kompartiianyń shekpeninen shyqqan sheneýnikterdiń ulttyń qundylyqtaryn tolyq qabyldai almaǵanyn, onyń negizgi ideialary KPSS-tyń qaǵidalaryna qaishy keletinin túsinbegenin ańǵartady. Onyń ústine, basqasyn bylai qoiǵanda, Prezidenttiń «Rýhani jańǵyrý» maqalasynda, «Ult birligi» doktrinasynda, «Máńgilik El» ideiasynda Qazaqstannyń óz ulttyq biregeiligin qalyptasyrý máselesi, ony nyǵaitý úshin ótkenniń keritartpa ideologiiasynan arylý týraly kóp másele kóterilip, kóp is-shara júrip jatyr. Sharany uiymdastyrýshylar bul sharanyń memlekettik baǵdarlamalarǵa qaishy keletinin túsinbegen de syńaily.
Qazaqstan halqynyń kópshiligi, sonyń ishinde ásirese jastar KSRO-ny qazaq halqyn otarlaýdyń jalǵasy dep tanidy. Tarih oqýlyqtarynda da, jalpy memlekettik istoriografiiada da osylai aitylyp júr. Osyndai jaǵdaida otarshyldyqtyń jaǵymsyz simvoly sanalatyn uiymnyń mereitoiyn úlken deńgeide toilaý – memlekettik qyzmetkerlerdiń halyq pikirimen sanaspaitynyn, halyqtan alshaq ekenin aiǵaqtaidy.
Jalpy, simvol máselesi – óte názik másele. Adamdar simvol úshin soǵysyp ta jatady. Ásirese, Qazaqstan siiaqty postkolonialdy elde otarlaýdyń belgisi sanalatyn keńestik belgilerdi qoldanýda osyny eskergen jón.
Muhtar Seńgirbaidyń feisbýktaǵy jazbasynan
