Parlament Senatynyń jalpy otyrysynda «2007 jylǵy 6 naýryzdaǵy Qazaqstan Respýblikasynyń Úkimeti men Grýziia Úkimeti arasyndaǵy Halyqaralyq avtomobil qatynasy týraly kelisimge ózgerister men tolyqtyrýlar engizý týraly hattamany ratifikatsiialaý týraly» Zańy qabyldandy, dep habarlaidy "Ult aqparat".
Atalǵan Hattama ekijaqty jáne tranzittik, sondai-aq úshinshi elge/elderden avtokólikpen júk tasymaldaýǵa ruqsat júiesin engizýdi kózdeidi.
«Qazirgi kezde eki el arasynda qaýipti júkter men aýyr salmaqty júkterdi qospaǵanda, avtokólikpen ekijaqty, tranzitti jáne úshinshi elderge júk tasymaldaý ruqsatsyz negizde júzege asyrylady. Ruqsatsyz júie avtomobil tasymalyn oryndaý kezinde Grýziianyń kólik operatorlaryna basymdyq berip, ulttyq tasymaldaýshylardyń múddesin tolyqtai qorǵaýǵa múmkindik bermeidi. Atap aitqanda, 2020 jyly eksport-import baǵytynda tasymaldanǵan 18 myń 96 tonna júktiń 29 paiyzy otandyq tasymaldaýshylar enshisine kelse, 57 paiyzyn grýzin kólik operatorlary tasymaldady», - dedi Indýstriia jáne infraqurylymdyq damý ministri Beibit Atamqulov.
Osyndai jaǵdaidyń basty sebepteri:
- Grýziiada halyqaralyq tasymaldaǵy avtokólik parki artqan. Elimiz parki 7 myń 754 bolsa, Grýziiada 8 myń 901-ge jetti;
- sońǵy kezderi Grýziia aýmaǵynda Grýziia-Túrkiia, Grýziia-Ýkraina siiaqty birlesken avtotasymal kásiporyndary ashyldy;
- Grýziia eliniń teńizge shyǵýǵa múmkindigi bar.
«Sondyqtan ruqsat júiesin engizý eki el arasyndaǵy avtokólikpen júk tasymal naryǵynda tepe-teńdikti ornatýǵa múmkindik beredi. Ekinshiden, otandyq kólik operatorlarynyń tasymaldaǵy úlesin arttyrýǵa yqpal etedi. Úshinshiden, otandyq tasymaldaýshylar tasityn júk kólemi ulǵaiyp, olardyń tabysy artady. Atalǵan Hattamany ratifikatsiialaý biýdjet qarajatyn jumsaýdy qajet etpeidi», - dedi ministr.
