QR Densaýlyq saqtaý ministri Eljan Birtanov jańa aýrýhanalardy ne úshin salý kerektigin túsindirdi, dep habarlaidy "Ult aqparat".
«Biz aýrýdyń aldyn alý men erte anyqtaýǵa bet aldyq. Bul úshin emhanalyq kómekti damytamyz. Búkil álem aldymen Almaty, al odan keiin Astana deklaratsiialaryn qoldady. Biraq, statsionarlyq kómek te damýy tiis. Óitkeni, soqyrishek nemese bosaný eshqaida joǵalyp ketpeidi. Kardiohirýrgter men neirohirýrgter infarkt pen insýlt kezinde, al travmatolog jaraqattaný kezinde qutqarýy tiis. Týa bitken jáne júre bitken kemistigi bar balalarǵa operatsiia, al eresekterge býyndar ne bolmasa ózge de aǵzalar men tin transplantatsiiasy qajet. Munyń barlyǵyn jáne basqa da kóp dúnieni statsionarlyq jaǵdaida ǵana jasaýǵa bolady», - dep jazdy ministr Facebook paraqshasynda.
Alaida, onyń dereginshe, aýrýhanalarymyzdyń 80 paiyzdan astamy sonaý keńes zamanynda salynǵan. Buǵan qosa, 20 paiyzdan astamy emdeý ǵimaratyna beiimdelgen, iaǵni burynǵy jataqhana, balabaqshada ornalasqan. Aýrýhanalardyń jalpy tozýy 60 paiyzdan asyp ketken.
«Mundai jaǵdaida aldyńǵy qatarly tehnologiialardy damytý múmkin emes. Olar patsientter men personaldar úshin jaisyz jáne meditsina qyzmetkerleriniń kásibi turǵyda ósýin tejeidi. Búkil progressivti álem jańa klinikalar salýda jáne azamattarymyz Ońtústik Koreianyń, Germaniianyń nemese Túrkiianyń zamanaýi aýrhanalarynda emdelgisi keledi. Sondyqtan biz sheteldik seriktesterdi tarta otyryp, jańa aýrýhanalar salýymyz, aldyńǵy qatarly meditsinalyq tehnologiialardy engizýimiz jáne mamandarymyzdy oqytýymyz qajet.
Jekelegen ári tar profildi eski aýrýhanalardy aýystyrýymyz kerek. Tek sol jaǵdaida ǵana zamanaýi tehnologiiaǵa qol jetkize otyryp, meditsina qyzmetkerlerimizdiń kásibiligi jańa deńgeige kóteriledi. Sol kezde ambýlatoriialyq jáne statsionarlyq kómektiń sabaqtastyǵy bolady. Al qazaqstandyqtarǵa ońtaily ári sapaly otandyq meditsina qyzmeti beriledi», - dedi Eljan Birtanov.
