.jpg)
Foto: ashyq derekkóz
Bas prokýratýra telefon alaiaqtarynyń áreketteri men olardan qorǵanýdyń jańa tásilderi týraly eskertti. Vedomstvo málimetinshe, biyl telefon alaiaqtarynyń qurbanyna ainalǵan azamattardyń sany 6,1 myńnan asqan, dep habarlaidy Ult.kz.
Quzyrly organnyń habarlaýynsha, alaiaqtyq shemalar kúrdelene túskenimen, negizgi ádis ózgerissiz qalyp otyr. Ádette jábirlenýshiniń telefonyna «1414» qysqa nómirinen SMS-kod keledi. Budan keiin alaiaqtar memlekettik organ, bank nemese kýrerlik qyzmet qyzmetkeri retinde habarlasyp, sol kodty aitýdy suraidy.
Osydan soń ekinshi qońyraý túsip, qaskúnemder ózderin bank, politsiia nemese UQK-niń «qaýipsizdik qyzmeti» retinde tanystyrady. Kei jaǵdailarda bailanys beineqońyraý arqyly da júzege asady. Alaiaqtar aldyńǵy qońyraý jalǵan bolǵanyn aityp, kodtyń kómegimen shottaǵy qarajat esepten shyǵarylýy nemese nesie rásimdelýi múmkin dep qorqytady.
Senimge kirgen soń olar jábirlenýshini nesie rásimdeýge jáne aqshany «qaýipsiz shotqa» aýdarýǵa kóndiredi. Nátijesinde qarajat jymqyrylyp, azamattyń atyna alaiaqtyq nesieler rásimdeledi.
Bas prokýratýra málimetinshe, buryn «1414» nómirinen SMS-kod alý úshin tek telefon nómirin engizý jetkilikti bolǵan. Qazir bul júielerge qol jetkizý tek biometriialyq aýtentifikatsiia (FaceID), elektrondyq tsifrlyq qoltańba nemese eGov QR-kod arqyly júzege asady. 2025 jyldyń jeltoqsan aiynan bastap atalǵan talaptardy engizbegen júieler «1414» SMS-shliýzinen ajyratylǵan.
Bas prokýratýra azamattarǵa memlekettik organdar men bankter eshqashan SMS-kodtardy, karta derekterin nemese parolderdi suramaitynyn, «qaýipsiz shot» degen uǵymnyń joq ekenin eske saldy. Sondai-aq kúdikti qońyraýlar kezinde jeke derekterdi úshinshi tulǵalarǵa bermeýge jáne kúmán týyndaǵan jaǵdaida dereý bankke nemese ýákiletti organdarǵa júginýge shaqyrdy.
Quzyrly organ qazaqstandyqtardy qyraǵy bolýǵa jáne kibergigiena erejelerin saqtaýǵa úndedi.
