Buryn kitap kóp oqymaǵan, gazet qaramaityn kezimde men de osyǵan ózimshe jaýap izdep, oilanýshy edim.
Sóitsem qazaq bul suraqqa jaýap berip kele jatqanyna bir ǵasyrdan asqan eken ǵoi.
Abai tiri turǵanda-aq ony búkil qazaq moiyndap qoiǵan. Abai qaitys bolǵan soń kóp uzamai Álihan Bókeihan ózi muryndyq bolyp, kitabyn bastyrǵan. Ahmet Baitursynuly "Qazaqtyń bas aqyny" dep maqala jazǵan.
HH ǵasyrdyń 20-jyldarynda shyqqan "Jańa ádebiet" jýrnalynda "Men qalai jaza bastadym?" degen aidar bolǵan. Sonda Iliias, Beiimbet, Sákender alǵashynda qalai jazǵandaryn eske alady. Bárinde bir uqsastyq bar: Abaidy oqyǵan soń jańa deńgeige shyqtym deidi.
40-50 jyldary, tipti odan keiin Áýezov pen ol kisiniń shákirtteri qatty qýdalaý kórgen. Abaidy saqtap qalý úshin.
Táýelsizdik alǵan soń, 1995 jyly birinshi úlken toi Abaidyń 150 jyldyǵy boldy.
Abaidy tereńirek bilgisi kelgen adam Táken Álimqulov, Tursyn Jurtbai, Tursynjan Shapailardy oqyp kórýine bolady. Qasym Amanjol túsirgen "Anyq Abai" da jaqsy deidi. Baǵashar Tursynbaiuly Abaidyń balalary týraly jazyp júr. Jalpy ár qazaqtyń óz Abaiy bar. Kenjebai Ahmetovpen sóilesseńiz, Abaidyń tabiǵat týraly óleńderin múlde basqasha túsinesiz.
Eger Abaidy joqqa shyǵarǵymyz kelse, onda aty atalǵan adamdardyń bárin joqqa shyǵarý kerek. Aty atalmaǵandardan Baýyrjan Momyshuly, Jumabek Táshenov, Ózbekáli Jánibekov jáne basqa da myqty degen qazaqtyń bárin betinen alý kerek.
Ulttyń oilaý deńgeii Abaidan keiin kelesi bir kezeńge kóterilgen. Ózi "Qazaqqa qara sózden des bermedim" deidi. Ol óz zamanyndaǵy ǵana emes, qazirge deiingi qazaqtarǵa des bermei turǵan adam.
Abai arqasyn islamǵa súiep, óziniń Qudai bergen daryny men mineziniń arqasynda, úlken órkeniet jetpegen kishkentai Jidebaiynda otyryp-aq adamzattyń oi keńistigin erkin aralap, eshkimnen yqpai, qazaqqa jany ashyp qan jylap otyryp aitatynyn aityp ketken adam ǵoi.
Abaimen talaspai-aq, Abaidan keiingi oryndarǵa talpynsaq ta jaman bolmaimyz. "Birińdi, qazaq, biriń dos kórmeseń, istiń bári bos" dep, ult retinde qor bolmaýdyń, joiylmaýdyń formýlasyn aityp ketken adam ǵoi. Alla razy bolsyn ol kisige.
Arman Álmenbettiń feisbýktaǵy jazbasynan
