Mashina jasaý salasynda aldyńǵy qatardaǵy 21 joba iske asyrylady. Bul týraly búgin Úkimet otyrysynda QR Indýstriia jáne infraqurylymdyq damý ministri Qaiyrbek Óskenbaev aitty, dep habarlaidy QazAqparat.
Ministrdiń aitýynsha, mashina jasaý salasynda aldyńǵy qatardaǵy 21 jobany iske asyrý josparlanǵan. Onyń ishindegi negizgi baǵyttar boiynsha:
- importty almastyrý áleýeti 130 mlrd teńge (avtomobil shinalary, turmystyq tehnika, kompiýterlik jiyntyqtaýyshtar, shanaqtardyń qalyptaý bólshekteri, kólikke arnalǵan áinek óndirisi, júk avtomobilderi, metall óńdeýdiń avtomattandyrylǵan jelileri, munai-gaz jabdyǵy jáne t.b.);
- eksportqa baǵyttalǵan jobalardy júzege asyrý (avtoshinalar, shoiyn quiý, ustalyq-bandaj kesheni, planshetter men smartfondarǵa arnalǵan juqa shyny, «Belarýs» traktorlaryna arnalǵan kabinalar, aliýminii diskiler, izotermiialyq vagon-termostar, elektr tehnikalyq jabdyq pen jinaqtaýyshtar, shaǵyn stantsiialarǵa arnalǵan joǵary voltty apparatýra jáne t. b.) eksportty ulǵaitý áleýeti 622 mln AQSh dollary.
«Himiia ónerkásibinde 2025 jylǵa deiin aldyńǵy qatarly 18 jobany iske asyrý josparlanyp otyr. Atalǵan jobalar kaltsiilengen soda, polipropilen, natrii tsianidi jáne mineraldy tyńaitqyshtar óndirýdi kózdeidi. Olar tek ishki naryqqa ǵana emes, sondai-aq ónim eksportyna da baǵdarlanǵan», - dedi ol.
Qaiyrbek Óskenbaev qurylys materialdarynyń óndirisi salasynda da júzege asyrylatyn jobalarǵa toqtaldy.
«Bul rette 890 mln AQSh dollary kólemindegi ónim importyn almastyrýǵa, sondai-aq eksport kólemin 206 mln AQSh dollaryna deiin ulǵaitýǵa múmkindik beretin aldyńǵy qatarly 24 jobany iske asyrý josparda bar. Jalpy keramikalyq plitalar, avtoklavty gazobloktar, jylý oqshaýlaǵysh materialdar, sendvich-panelder siiaqty taýarlar boiynsha importty tolyqtai almastyrý josparlanyp otyr. Budan basqa, elimizde buryn-sońdy óndirilmegen sanfaians, bólmearalyq esikter, laktalǵan aǵash-jańqaly taqtalar, eden jabyndary siiaqty taýarlardyń óndirisi iske qosylatyn bolady», - dedi ministr.
Ministrdiń aitýynsha, jobalardy iske asyrý nátijesinde 9,1 mlrd AQSh dollary kólemindegi taýarlar boiynsha import almastyrylyp, shikizattyq emes taýardyń eksport kólemi 17,2 mlrd AQSh dollaryna deiin ulǵaitylady.
«Keramikalyq plitalar, kaltsiilengen jáne kaýstikalyq soda, jylý oqshaýlaǵysh materialdar, arnaiy koks, kalii tyńaitqyshtary jáne basqa da taýarlar boiynsha import tolyqtai almastyrylady dep kútilýde. Ferroqorytpalardyń álemdik eksporty boiynsha 2-shi orynǵa shyǵý, bolat importyn 75 paiyzǵa qysqartý, maqta óńdeý kórsetkishterin 100 paiyzǵa deiin arttyrý, sondai-aq eden jabyndary men geosintetikanyń importyn 25 paiyzǵa almastyrý josparda bar», - dedi Qaiyrbek Óskenbaev.
