Shyǵys Qazaqstan oblystyq Pýshkin atyndaǵy kitaphanada óskemendik jazýshy ári ólketanýshy Boris Sherbakovtyń «Jidebaidyń juldyzdy dalasy» - «Zviozdnaia step Jidebaia» atty kitaby jaryqqa shyqty. Ólketanýshynyń tyń týyndysy qazaq jáne orys tilinde oqyrmanǵa jol tartty, dep habarlaidy "Ult aqparat".
Ólketanýshy kitapty jazý úshin Abai aýdanyndaǵy uly aqynnyń týǵan jerin aralap, «Abai-Shákárim» memorialdyq keshenin birneshe jyl boiy zerttegen. Qazaqtyń uly tulǵasy dúniege kelgen meken Eýraziia keńistiginiń týra ortasy - kindik núktesi ekeni belgili. Jas kezinen Shyǵystyń shyraily mekenin armansyz aralaǵan Boris Sherbakovtyń týyndysynyń tusaýkeserine birqatar ziialy qaýym ókilderi qatysty.
Boris Sherbakovty jerlesteri biologiia ǵylymdarynyń doktory, Qazaqstan Respýblikasynyń Jazýshylar odaǵynyń múshesi, Shyǵys Qazaqstan oblysy ákiminiń arnaiy syilyǵynyń laýreaty, bilgir ornitolog retinde tanidy. Kitap jazýmen birge ornitolog óńirdiń ań-qustarynyń ahýaly máselesin jii kóterip, qoǵamdyq jumystarǵa belsene aralasyp júr.
«Osy týyndyny jazýda kóp eńbektendim. Nelikten Abai týraly jazýdy uiǵardym?.. Uly aqynnyń ulylyǵyn sózben jetkizý múmkin emes. Sol sebepti, Abaidyń júrip ótken joldaryn, onyń ólmes týyndy jazǵan óńirdiń qasietin oqyrmanǵa sezdire bilýge tyrystym», - deidi Boris Sherbakov.
Avtor óz kitabynda jalǵyz aqynnyń ǵana ómirine toqtalyp qalmai, qazaq atyn álemge pash etken, osy óńirdiń týmalary týraly da jazyp ótken. Kitaptyń ár taraýy Abai Qunanbaiulynyń ómiri týraly keremet syr shertip, Jidabai óńiriniń qasietti meken ekenin pash ete túsedi.
«Boris Sherbakov Abai týraly týyndy jaza otyryp, Uly aqynnyń ómirin zertteýde tyńnan túren sala bildi. Óz basym jazýshynyń Abai jaily kitap jazýǵa jyldar boiy oqtalyp júrgenin biletin edim. Uly dalaǵa degen sheksiz mahabbat jazýshyny osy týyndyny dúniege ákelýge jeteledi», - deidi bibliograf Janna Saqpanova.
