Shyǵys Qazaqstan oblysynyń ákimi D. K. Ahmetov myrzaǵa,
Óskemen qalasynyń ákimi Q. M. Tumabaev myrzaǵa
oblystaǵy birqatar qoǵamdyq-saiasi uiymdardan
Usynys hat
Elbasynyń «Rýhani jańǵyrý» baǵdarlamasyna orai oblysymyzda ózińizdiń saliqaly basshylyǵyńyzben birqatar ońdy sharalar júzege asyp, qazaqsha aitsaq óńir jurtshylyǵynyń ólgeni tirilip, óshkeni janbasa da birshama sergip, serpilip qalǵany ras. Bul shaǵyn hatta ol sharalardy tizbelep jatý artyq. Desek te onomastika, toponimika máselelerine kelgende Elbasynyń talap-tilekterine jaýap bere almai, jer shuqyp qalatyn tustarymyz da jeterlik. Árine, «Rýhani jańǵyrý: Bolashaqqa baǵdarda» Nursultan Ábishuly Nazarbaev memleketimizdiń negizin qurap otyrsa da qazaq halqynyń osy ýaqytqa deiin joǵarydaǵy máselelerde mandymdy jumystar tyndyrýǵa múmkindigi bolmaǵanyn, endi ony kesheýildetsek kesh bolatynyn da emeýirinmen jetkizýge tyrysqan.
Ózderińizge belgili, Shyǵys Qazaqstan, onyń ishinde ásirese Óskemen, Zyrian, Ridder, Shemonaiha qalalarynyń kóshe ataýlary sonaý Keńestik kezeńdegi keiip-bolmysyn kóp buza qoiǵan joq. Ásirese, oblys ortalyǵy Óskemen kósheleri áli kúngi keshegi bolsheviktik ataýlarmen siresip tur. Qazan tóńkerisiniń «tórkin jurty» — Reseidiń ózi olardan baiaǵyda arylyp, tazaryp, jańǵyryp alǵan. Al, oblysymyzdyń qalalary men aýyldary Óskemenge qarap boi túzeitini – shyndyq.
Ardaqty Danial Kenjetaiuly!
Sizdiń Óskemen qalasy ákimine qaladaǵy 20-dan astam kóshelerdiń ataýlaryn «Rýhani jańǵyrýǵa…» sai keletindei etip ózgertý jaily nusqaý bergenińizdi estip, qatty qýandyq. Siz basshylyq jasaǵan kezde qaladaǵy 700-den astam kóshelerdiń tym qurysa 30 paiyzy qazaqshalanyp qalsa, erteńgi kúni elimiz men jurtymyzdyń aýzynda osy bir igilikti isińiz qalatyny shyndyq. Jýyrda jergilikti baspasóz betterinde: «Óskemendegi Voroshilov kóshesiniń ataýy Jaqiia Shaijúnisovtyń atymen atalǵaly jatyr» degendei habarlardy birneshe márte oqyp qaldyq. Áńgime mynada.
Jaqiia Shaijúnisovtyń kezindegi Semei oblysy aýmaǵynda, atap aitar bolsaq, Kókpektidegi bilim berý salasyna sińirgen eńbegi mol ekendigi shyndyq. Eńbek ótemine dep ol aǵamyzdyń omyraýyna Sotsialistik Eńbek Eriniń Qyzyl Juldyzy taǵylǵan. Lenin ordenimen alqalanǵan. Áneý bir jyldary Semeidegi úlken bir kóshege Shaijúnisov ataýy berildi. Artta qalǵan urpaqtaryna, halqyna ol kisiniń arýaǵy riza!
Óskemendegi Voroshilov kóshesi — Abai dańǵylyn qiyp ótetin úlken kóshe. Egerde ol kóshege shynynda da halqynyń ardaqtysynyń ataýy beriler bolsa, oǵan asa úlken aqyn, iri filosof, kemeńger aýdarmashy, Abai aǵasynyń pálsapasyn zańdy túrde jalǵastyrýshy, eren túrkitanýshy, qazaq shejiresiniń negizin qalaǵan, ony urpaqqa qaldyryp ketken Shákárim Qudaiberdiulynyń atyn berý kerek!!! Abai men Shákárim – ultymyzdyń abyroiy men ar-ojdany! Sol eki alyptyń attaryn iemdengen qos kóshe danalyq pen taǵylymnyń úlgisindei bolyp qiylysyp jatsa, Shyǵys Qazaqstannyń barsha jurty riza bolatyny aqiqat!!!
Sonymen qatar taǵy da bir aitpai ketýge múldem bolmaityn másele bar, ol – Óskemendegi Ýshanov alańyn jańǵyrtý. Ótken ǵasyrdaǵy qylyshynan qan sorǵalaǵan bolshevik Ýshanovqa qoiylǵan eskertkishti julyp tastap, búgingi jáne keler urpaq sanasyn jańǵyrtýymyz qajet! Ol alańǵa Alash kósemi Álihan Bókeihanovtyń esimin berip, sol arystyń eskertkishin qoiý lázim!
Elbasynyń elimizdiń strategiialyq damýynda Basym baǵyt dep ekpin túsirip otyrǵan «Rýhani jańǵyrý…» baǵdarlamasynyń – Sizder úshin de asa mańyzdy ekenin óte jaqsy túsinemiz. Sondyqtan da el men jurtqa sińirip júrgen eńbekterińizdi qaryzym dep emes, paryzym dep túsinetin Sizderdiń bolashaqtaǵy sharýalaryńyzǵa sáttilikter tilei otyryp, osy bir ulttyq-saiasi máselelerdi ońdy shesher degen úmittemiz!
QR Jazýshylar odaǵy ShQO filialynyń direktory Á. Qańtarbaev.
«QR salalyq kásipodaǵy» ShQO filialynyń Tóraǵasy T. Túsipbekov.
«Altai asý» qoǵamdyq birlestiginiń atqarýshy direktory S. Qusanbaev.
ShQ oblystyq Aqsaqaldar alqasynyń Tóraǵasy J. Áshimov.
Óskemen qalalyq Ardagerler keńesi tóraǵasynyń orynbasary S. Aqanov.
