Óskemende Sábiler úiiniń direktory jeke esepshotyna elden aqsha jinaǵan, dep habarlaidy "Ult aqparat" oblystyq densaýlyq saqtaý basqarmasyna silteme jasap.
Óskemendegi Sábiler úiiniń burynǵy direktory Quralai Isenovanyń basy daýǵa qaldy. Bul oqiǵa ol osy qyzmetke taǵaiyndalǵan soń arada úsh ai ótkende bastalǵan. Ol qoimadan merzimi ótip ketken jaialyqtardy kórgen, alaida eshqandai shara qoldanbaǵan.
Oblystyq densaýlyq saqtaý basqarmasy basshysynyń orynbasary Vladimir Lidiń sózine sensek, merzimi ótken bul taýar joiylýǵa tiis bolatyn.
Qazir Sábiler úiinde osyǵan bailanysty muqiiat tekserý júrip jatyr. Atalmysh tekserýdiń barysynda Quralai Isenovaǵa qatysty birqatar jaittyń basy ashyldy.
«Quralai Isenova jekemenshik qordy basqarǵan, onysy qujatpen rastalyp otyr. Qaiyrymdylyq uiymynyń quryltaishy qujattarymen qatar, Facebook paraqshasy da bar. Jai ǵana ishinara tekserýdiń ózinde aýrý balalarǵa jáne Sábiler úiiniń tárbielenýshilerine arnap qarjy aýdaratyn esepshot Quralai Isenovanyń óz atyna rásimdelgen bolyp shyqty. Alaida Sábiler úiiniń óz resmi esepshoty bar ǵoi. Sondai-aq, Quralai Isenova issaparǵa kettim dep esep bergen, biraq onyń issaparǵa barǵanyn rastaityn qujattar joq. Demek, munda eńbek zańnamasy óreskel buzylyp tur» delingen basqarma taratqan habarlamada.
Mekemeniń málimetinshe, qazir kishkentai balamen jumys isteitin adamdardyń bir jaqqa barýǵa moraldyq quqyǵy joq, óitkeni bul óte qaýipti - olar koronavirýs juqtyryp ákelip, ony búldirshinderge taratýy múmkin.
«Quralai Isenovamen jasalǵan kelisimshart buzyldy. Ol synaq merziminen óte almady. Sońǵy málimet boiynsha, onyń taǵy bir sebebi - qaiyrymdylyq qarajatynyń maqsatsyz jumsalýy. Qazirgi tańda sybailas jemqorlyqqa qarsy tergeý júrip jatyr. Densaýlyq saqtaý basqarmasy mekemeniń ishki jaǵdaiyn turaqtandyrý úshin tiisti sharanyń bárin qabyldaidy», - deidi Vladimir Li.
