Óskemen qalasynda ótken demalys kúnderi órtten eki adam kóz jumdy, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, 14 tamyzda saǵat 19.41-de jeke turǵyn úide órt shyqqan. Oqiǵa ornyna shuǵyl kelip jetken qutqarýshylar úi ishinde es-tússiz jatqan 39 jastaǵy er adamdy tapty. Apattar meditsinasy ortalyǵynyń qyzmetkerleri reanimatsiialyq sharalar júrgizgenimen onyń ómirin saqtap qalý múmkin bolmady.
Ekinshi oqiǵa 15 tamyz kúni tańǵy saǵat 05.00-de M.Tynyshpaev kóshesinde bolǵan. Jer úidiń 156 sharshy metr aýmaǵyn jalyn sharpyǵan.
«Órt sóndirýshiler tilsiz jaýdy aýyzdyqtaý barysynda 60 jastaǵy úi iesiniń denesin tapty. Eki oqiǵa da órttiń shyǵýyna – otty abaisyz qoldaný sebep bolyp otyr. Jalpy jyl basynan beri oblys boiynsha 862 órt tirkelgen», - delingen habarlamada.
