Qostanaidaǵy Balalarǵa arnaýly áleýmettik qyzmet kórsetý ortalyǵynda tárbielenip jatqan jasóspirim kóz jumdy. Qaiǵyly jaǵdai 28 shilde kúni bolǵan, dep habarlaidy ult.kz.
Bul aqparatty Sputnik Qazaqstanǵa oblystyq Jumyspen qamtýdy úilestirý jáne áleýmettik baǵdarlamalar basqarmasynyń basshysy Dinara Qarymsaqova rastady.
Onyń aitýynsha, oqiǵa bolǵan kúni balanyń jaǵdaiy qalypty bolǵan. Dene qyzýy kóterilmegen, eshqandai shaǵymy tirkelmegen.
«Bala belsendi boldy. Túski asyn ishkennen keiin kúndizgi uiqyǵa jatqyzyldy», – dedi basqarma basshysy.
Dinara Qarymsaqova ortalyqta tárbielenýshilerge táýlik boiy baqylaý jasalatynyn atap ótti. Onyń málimetinshe, toptarda kishi meditsinalyq qyzmetkerler turaqty kezekshilik atqarady, meditsinalyq beketter táýlik boiy jumys isteidi. Sonymen qatar balalardy dárigerler kún saiyn tekserip otyrady.
Áleýmettik jelilerde jasóspirimniń ólimine ǵimarattaǵy aptap ystyq pen konditsionerdiń bolmaýy sebep bolýy múmkin degen aqparat taraǵan. Alaida bul málimet resmi túrde joqqa shyǵaryldy.
Basqarma ókilderi ortalyqtaǵy ár topta konditsioner ornatylǵanyn jáne ystyq kúnderi temperatýralyq rejim men aýyz sý tártibi qatań baqylaýda bolǵanyn málimdedi.
Qazirgi ýaqytta politsiia atalǵan fakti boiynsha qylmystyq is qozǵady. Oqiǵanyń naqty sebepteri men mán-jaiyn anyqtaý úshin qajetti saraptamalar taǵaiyndaldy.
