Óskemen qalasynda politsiia qyzmetkerlerine qarsylyq kórsetken er adam ustaldy, dep habarlaidy "Ult aqparat" qalalyq politsiia basqarmasynyń baspasóz qyzmetine silteme jasap.
Vedomstvoda habarlaǵandai, 8 aqpanǵa qaraǵan túni Óskemen qalalyq politsiia basqarmasynyń PPB patrýldik jasaǵyna kópqabatty úilerdiń birinde tynyshtyqty buzý týraly qońyraý kelip túsken.
Shaqyrý ornyna dereý jetken patrýldik politsiia batalonynyń inspektorlary politsiia aǵa leitenanty Nurjan Kakeev pen politsiia aǵa leitenanty Bekarys Abdoldanov alkogoldik ishimdik ishken eki er adamnyń 9-qabattaǵy baspaldaqta bir-birimen qatty sóilesip turǵanyn anyqtaǵan.
Politsiia qyzmetkerleri er adamdarǵa olardyń tártipti buzyp jatqanyn túsindirip, shý shyǵarmaýyn ótingen. Alaida, olar politseilerdiń sózin tyńdamai, daýlasa bastaǵan. Keiin olardyń biri politsiia qyzmetkeriniń moinyna pyshaq suǵyp, sodan keiin baspaldaqpen tómen qarai júgirip ketken.
Pyshaq jaraqatyn alǵanyna qaramastan, Nurjan Kakeev tez arada qashyp bara jatqan tártip buzýshynyń artynan júgirgen. Kóshede júgirip kele jatqan er adam politsiiadan qashyp qutyla almaitynyn túsinip, politsiia qyzmetkerleriniń aldynda pyshaq ala bastaǵan.
«Osyǵan bailanysty politseiler er adamnyń qolyndaǵy pyshaqty julyp alý úshin arnaiy «PR» quralyn qoldanǵan, atap aitqanda, olar tártip buzýshynyń qolyn rezeńke shoqparmen uryp jibergen, sol kezde er adam pyshaqty qolynan túsirip alǵan», - deidi politsiia qyzmetkerleri.
Qazirgi kezde ustalǵan 24 jastaǵy er adam ýaqytsha ustaý izoliatoryna qamaldy. Oǵan qatysty QR QK 380-babynyń 2-tarmaǵy boiynsha qylmystyq is qozǵaldy.
Qazirgi ýaqytta politsiia aǵa leitenanty Nurjan Kakeegev ota jasaldy, onyń ómirine qaýip tónip turǵan joq.
