QR Ortalyq sailaý komissiiasy sailaý zańnamasyn túsindirýdiń túpkilikti sýbekti emes. Bul týraly QR OSK múshesi Erlan Daýylbaev aitty, dep habarlaidy QazAqparat.
Onyń aitýynsha, Ortalyq sailaý komissiiasy sailaý týraly zańnamaǵa óz betinshe túsinikteme berýge; óz betinshe qandai da bir túsindirýler jasamai, sailaý týraly zańnamany túsindirýdi uiymdastyrýǵa; sailaý zańnamasynyń jekelegen erejelerin ózge zańdar turǵysynan túsindirý úshin basqa memlekettik organdarǵa júginýge quqyǵy bar.
«Osy úsh aspektini eskere otyryp, mynadai qorytyndy jasaýǵa bolady. OSK sailaý zańnamasyn túsindirý boiynsha jalǵyz jáne túpkilikti sýbekti emes, kerisinshe «úilestirýshi» nemese «uiymdastyrýshy» rólin atqarady. OSK-nyń sailaý zańnamasyn túsindirý aiasynda «Quqyqtyq aktiler týraly» Zań komissiiaǵa óziniń normativtik quqyqtyq qaýlylaryn ǵana resmi túsindirý jóninde ókilettikter beredi», - dedi Erlan Daýylbaev komissiia otyrysynda.
Sonymen qatar ol uiymdastyrýshy rólinde bola otyryp, OSK óziniń normativtik quqyqtyq qaýlylary boiynsha resmi túsindirme berý úshin ýákiletti memlekettik organdardyń ustanymyn aldyn ala suratýǵa quqyly ekenin basa aitty.
«Bul rette, OSK zańdardyń, sonyń ishinde sailaý týraly Konstitýtsiialyq zańnyń normalaryna resmi túsindirme berýge quqyly emes. OSK apparaty óz quzyreti sheginde sailaýǵa bailanysty qoǵamdyq qatynastardy retteitin normativtik quqyqtyq aktilerge tek naqty sýbektilerge qatysty nemese naqty jaǵdaiǵa qatysty beiresmi túsinikteme bere alady», - dedi QR OSK múshesi.
