kollaj: Tengrinews.kz
Búgin Ortalyq sailaý komissiiasy prezidenttikke usynylǵan úsh birdei kandidatty tirkeýden bas tartty, dep habarlaidy "Ult aqparat".
Komissiianyń qaýlysyna sáikes, "Asar" birlestiginen Hairolla Ǵabjalilov, "Tájiribelik psihologiia" respýblikalyq qoǵamdyq birlestiginen Fatima Bizakova jáne Qazaqstan qurylysshylary odaǵynan usynylǵan Talǵat Erǵalievtiń kandidatýrasy "Qazaqstan Respýblikasyndaǵy sailaý týraly" Konstitýtsiialyq zańda belgilengen talaptarǵa sai kelmeidi.
Aita keteiik, Ǵabjalilovtiń kadidatýrasyn «Oralmandardyń «Asar» birlestigi» respýblikalyq qoǵamdyq birlestigi 11 qazanda usynǵan bolatyn.
OSK múshesi Asylbek Smaǵulovtyń baiandaýynsha, Hairýlla Ǵabjalilov QR Prezidenttigine kandidat retinde tirkelý úshin tiisti barlyq qujattardy tapsyrǵan. Keiin úmitker týraly derekterdi tekserý úshin IIM, Memlekettik qyzmet isteri jónindegi agenttik, Ádilet ministrligi jáne Qazaqstan Respýblikasy Bas prokýratýrasynyń quqyqtyq statistika jáne arnaiy esepke alý jónindegi komitetinen aqparat suratylǵan. Nátijesinde kandidattyń memlekettik qyzmet ótiliniń bolmaýyna bailanysty «QR sailaý týraly» Konstitýtsiialyq Zańynyń 54-baby, sondai-aq 59-baby 7-tarmaǵynyń 3-tarmaqshasyna sáikes qoiylatyn talaptarǵa sáikes kelmeitini anyqtalǵan.
Osylaisha, úmitkerdi tikeýden bas tartý týraly sheshim kóterildi. Ony Ortalyq sailaý komissiiasynyń músheleri bir aýyzdan maquldady.
QR Ortalyq sailaý komissiiasynyń múshesi Asylbek Smaǵulovtyń aitýynsha, QR IIM derekterine sáikes Hairýlla Ǵabjalilov QR azamaty emes jáne Qazaqstanda sońǵy 24 jyl turmaǵan.
Al, Talǵat Erǵalievtiń kandidatýrasyn «Qazaqstan qurylysshylar odaǵy» respýblikalyq zańdy tulǵalar birlestigi 10 qazanda usynǵan edi.
Ortalyq sailaý komissiiasynyń hatshysy Muhtar Ermannyń aitýynsha, úmitker Qazaqstan qurylysshylar odaǵy joǵary organy otyrysynyń prezidenttikke usyný týraly hattamasynan úzindi, ómirbaian derekteri, Ortalyq sailaý komissiiasynyń shotyna sailaý jarnasynyń engizilgenin kýálandyratyn qujat, jeke basyn kýálandyratyn qujattyń kóshirmesi jáne joǵary bilimi týraly diplomynyń kóshirmesin tapsyrǵan.
Qabyldanǵan qujattardy arnaiy organdar arqyly tekserý barysynda Talǵat Faizýlliuly Erǵalievtiń memlekettik qyzmettegi jumys ótili jetkiliksiz ekeni anyqtalǵan. Onyń memlekettik organdarda jumys tájiribesi 3 jyl 4 ai. Sonymen qatar onyń kandidatýrasyn zańdy uiym usynǵan. Talapqa sáikes, QR Prezidenttigine úmitker azamat sailaýǵa zańdy uiym atynan túspeýi tiis. Osyǵan sai, Talǵat Erǵaliev QR «Sailaý týraly» Konstitýtsiialyq zańnyń 55-baby 1-tarmaǵynyń erejelerine sáikes kelmeidi dep tanyldy. Tiisinshe, OSK úmitkerdi tikeýden bas tartý týraly sheshim qabyldady.
Sondai-aq, Ortalyq sailaý komissiiasy otyrysynda «Tájiribelik psihologiia» qoǵamdyq birlestigi usynǵan kandidat Fatima Bizaqovanyń talap etilgen barlyq qujattardy tapsyrǵany atalyp ótti. Keiin derekterdi rastaý maqsatynda OSK Memlekettik qyzmet isteri jónindegi agenttikten, Ádilet ministrliginen jáne Qazaqstan Respýblikasy Bas prokýratýrasynyń quqyqtyq statistika jáne arnaiy esepke alý jónindegi komitetinen, Ishki ister ministrliginen aqparat suratqan.
Nátijesinde Fatima Bizaqovanyń memlekettik qyzmettegi jumys ótili joq ekeni anyqtalǵan. Osyǵan bailanysty Ortalyq sailaý komissiiasy onyń kandidatýrasyn QR «Sailaý týraly» Konstitýtsiialyq zańnyń 54-babynda kózdelgen erejelerge sáikes emes dep tanydy. Sáikesinshe, quzyrly organ Fatima Bizaqovany QR Prezidenttigine kandidat retinde tikeýden bas tartý týraly sheshim qabyldaǵan.
Aita keteiik, Konstitýtsiia jáne "Sailaý týraly" Konstitýtsiialyq zań boiynsha prezidenttikke úmitker birneshe talapqa sai bolýy qajet. Olar:
- týmysynan Qazaqstan azamattyǵy bolýy;
- Qazaqstan aýmaǵynda sońǵy 15 jyl boiy turýy;
- joǵary biliminiń bolýy;
- jasy 40-qa tolǵan bolýy;
- belsendi sailaý quqyǵynyń bolýy;
- memlekettik qyzmette nemese sailanbaly laýazymdarda keminde 5 jyl jumys tájiribesiniń bolýy;
- memlekettik tildi erkin meńgerýi.
Aita keteri, osy ýaqytqa deiin 6 kandidat talapqa sai dep tanyldy. Olar: Meiram Qajyken ("Amanat" kásipodaqtar birlestigi), Qasym-Jomart Toqaev (Halyqtyq koalitsiia), Jigýli Dairabaev ("Aýyl" partiiasy), Nurlan Áýesbaev (JSDP), Qaraqat Ábden (Kásibi áleýmettik jumysshylar ulttyq aliansy) jáne Saltanat Tursynbekova (Qazaq analary — dástúrge jol" qoǵamdyq birlestigi). Qasym-Jomart Toqaev kandidattyń kýáligin alyp úlgerdi.
