Qyrǵyzstanda 10 qańtarda prezident sailaýy jáne memlekettik basqarý formasyn anyqtaityn referendým ótti. Saǵat 22:00-ge deiin sanalǵan daýystyń aldyn ala nátijesine qaraǵanda, sailaýshylardyń 38,70 paiyzy ǵana daýys bergen. Daýys berýge quqyly 3 563 574 adamnyń tek 1 581 569-y sailaý ýchaskesine kelgen.
Prezident sailaýynyń aldyn ala nátijeleri boiynsha, Sadyr Japarov 79,24 paiyzben alda keledi. Japarovqa negizgi baqtalas delingen Adahan Madýmarov 6,71 paiyz alǵan. Úshinshi orynda 2,35 paiyz daýsy bar Babyrjan Tólbaev tur. Qalǵan 12 úmitkerdiń kóbi 1 paiyzdan asa almaǵan.
Al memlekettik basqarý formasyn ózgertý týraly referendým boiynsha Sadyr Japarov komandasynyń usynysy – prezidenttik basqarýdy qalaityndar basym túsken. Qatysqandardyń 81,27 paiyzy barlyq bilikti prezident qolyna tapsyrýǵa kelisken. Parlamenttik basqarý formasyn qoldaǵandar 10,82 paiyz, ekeýine de qarsylar 4,42 paiyz bolǵan.
Bul - Qyrǵyzstandaǵy sailaýdyń sońǵy qorytyndysy emes. Ortalyq sailaý komissiiasynyń tóraiymy Nurjan Shaildabekovanyń elektrondy túrde berilgen daýystyń (halyqtyń basym bóligi osy formatty tańdaǵan – red.) 96 paiyzy sanalǵan. Qaǵaz júzinde jáshikke salynǵandardyń esebi áli belgisiz.
- Byltyr 4 qazanda Qyrǵyzstanda ótken parlament sailaýynyń qorytyndysymen kelispegen jurt kóshelerde narazylyq ótkizip, munyń sońy memlekettik ǵimarattardy basyp alýǵa, saiasi daǵdarysqa alyp kelgen. Halyq narazylyǵynan soń úkimet te, prezident Sooronbai Jeenbekov te otstavkaǵa ketken.
- Saiasi qarsylasyn urlap áketkeni úshin qamaýda otyrǵan Sadyr Japarovty narazylyqqa shyqqan jurt 5 qazanda túrmeden bosatqan. Keiin parlament músheleri ony premer-ministrdiń mindetin atqarýshy etip taǵaiyndady. Jeenbekov ornynan ketken soń ol prezident mindetin de qosa atqarýǵa kóshken. Keiin ol prezident sailaýyna túsý úshin ýaqytsha prezidenttikten bas tartqan.
- El basqarý formasyn qazirgi parlamenttik úlgiden prezidenttik úlgige kóshirý usynysyn da Sadyr Japarov usynǵan.
QR OSK basshysy keltirgen aldyn ala málimetterge sáikes, Qyrǵyzstan prezidenttigine úmitkerler jinaǵan sailaýshylar daýysynyń paiyzy kelesidei:
Japarov Sadyr – 79,24%
Isaev Kanatbek – 0,58%
Arstanbek Myktybek – 1,63%
Sooronkýlova Klara – 0,96%
Tashov Imamidin – 1,19%
Tagaev Rashid – 0,00%
Segizbaev Abdil – 1,43%
Madýmarov Adahan - 6,71%
Kasenov Aimen – 0,89%
Kochkorov Ýlýkbek – 0,7%
Baigýttiev Jenishbek – 0,09%
Abakirov Eldar – 0,46%
Asanov Kýrsan – 0,49%
Abdyldaev Arstanbek – 0,08%
Djeenbekov Ravshan – 0,19%
Kalmamatov Baktybek – 0,51%
Tolbaev Babyrjan – 2,35%
Imanaliev Kanybek – 0,16%
Barlyǵyna qarsy – 1,29%.
Aita ketken jón, QR Prezidenttigine úmitker sailaýda jeńiske jetý úshin 50%-dan astam daýsyn jinaýy kerek.
