Ortalyq sailaý komissiiasynyń hatshysy Sábila Mustafina Senat depýtattyǵyna úmitkerlerge BAQ-qa óz baǵdarlamalarymen shyǵý tártibin túsindirdi, dep habarlaidy QazAqparat.
Otyrysta QR Parlamenti Senatynyń depýtattyǵyna kandidattyń respýblikalyq biýdjet qarajatynan óteletin shyǵystarynyń mólsherin belgileý jáne QR Parlamenti Senatynyń depýtattyǵyna kandidattardyń sailaý qorlary týraly másele qaraldy. Sábila Mustafinanyń aitýynsha, zańǵa sáikes memleket Senat depýtattyǵyna sailanatyn kandidattarǵa óz baǵdarlamalarymen BAQ-qa shyǵý úshin qarajat teń bólinýine kepildik beredi.
«BAQ-qa shyǵý úshin kandidattarǵa qarajat bólý tártibi men kólemin Ortalyq sailaý komissiiasy aiqyndaidy. OSK-nyń kandidattarǵa BAQ quraldaryna shyǵý úshin qarajat bólý qaǵidalary boiynsha tiisti qaýlyǵa sáikes kandidattarǵa óz baǵdarlamalarymen BAQ-qa shyǵý tártibi mynadai: teledidardan 15 minýt, radiodan 10 minýt, merzimdi baspasóz basylymdarynda nemese jelilik basylymdarda 0,1 baspa tabaqtan artyq emes», - dedi ol.
Sonymen qatar Sábila Mustafina kandidattar ózderiniń sailaý aldyndaǵy baǵdarlamalarymen sóz sóileý úshin memleket bólgen qarajat sheńberinde baspa nemese jelilik basylymdardaǵy, tele-radioarnalardaǵy jariialanymdar kólemin ózderi bóletinin jetkizdi.
«Sondai-aq respýblikalyq biýdjet qarajatynan kandidattardyń sailaý aldyndaǵy jariialy is-sharalaryn ótkizýge, úgit materialdaryn shyǵarýǵa arnalǵan shyǵystary men kólik shyǵystary Ortalyq sailaý komissiiasy belgilegen mólsherde óteledi», - deidi OSK hatshysy.
Osylaisha joǵaryda baiandalǵannyń negizinde OSK óz qaýlysymen QR Parlamenti Senatynyń depýtattyǵyna kandidattyń respýblikalyq biýdjet qarajatynan óteletin shyǵystaryn 450 000 teńge kóleminde belgiledi:
1) teledidardan, radiodan baǵdarlamamen sóz sóileý jáne merzimdi baspa basylymdarynda 2 maqala jariialaý úshin - 300 000 teńge;
2) sailaý aldyndaǵy kópshilik is-sharalardy ótkizý jáne úgit materialdaryn shyǵarý úshin - 70 000 teńge;
3) kólik shyǵyndary úshin - 80 000 teńge.
Aita keteiik, osy jyldyń 12 maýsymynda Memleket basshysy Qasym-Jomart Toqaevtyń QR Parlamenti Senaty depýtattarynyń sailaýyn 2020 jylǵy 12 tamyzǵa taǵaiyndaý týraly qaýlysy shyqqan edi.
Osyǵan orai QR Ortalyq sailaý komissiiasynyń onlain rejimde otyrysy ótip, onda sailaýǵa qatysty kúntizbelik is-sharlar jospary bekitilgen. 13 maýsymnan bastap Senat depýtattyǵyna kandidattardy usyný bastaldy.
