Almatyda buryn politsiia qyzmetkeri bolǵan er adamnyń qazasy qoǵamda qyzý talqylanyp jatyr. Tergeýdiń aldyn ala málimetine sáikes, ony jubaiy órtep jiberdi degen kúdik qarastyrylýda, dep habarlaidy ult.kz.
Osy ýaqytqa deiin oqiǵaǵa qatysty marqumnyń týystarynyń ustanymy keńinen taralǵan bolsa, endi kúdikti áieldiń jaqyndary alǵash ret pikir bildirdi. Olar oqiǵanyń ózderine belgili tustaryn aityp, osy ýaqytqa deiin kópshilikke jariialanbaǵan jaittardy jetkizgen. Áieldiń sińlisi Rýslan Ótepbaiǵa suhbat berdi.
«Uldaryn tańǵa deiin urǵan. Áielin de uratyn. Ony ózi videoǵa túsirip alatyn bolǵan. Ony ápkem aitty. Ápkem qansha ketip qalsa da, kúieýi kelip alyp ketetin. Bilmeimin, qorqytady ma, ne úshin ketetinin túsinbeitinbiz», - dedi kelinshek.
Kúdiktiniń týystary istiń barlyq mán-jaiy jan-jaqty zerttelýi qajet ekenin aityp, qoǵamdy birjaqty qorytyndy jasaýǵa asyqpaýǵa shaqyrdy. Tergeý jalǵasyp jatyr, al istiń naqty mán-jaiyn quqyq qorǵaý organdary anyqtaityn bolady.
