Búgin QR Ortalyq sailaý komissiiasynyń otyrysynda Prezidenttikke usynylǵan Baqyt Jańabaevtyń, Nurjan Áltaevtyń jáne Jumatai Álievtiń kandtidatýrasyn tirkeýden bas tartty, dep habarlaidy QazAqparat.
Baqyt Jańabaev úmitkerlerdi tirkeýdiń sońǵy sátinde qujat tapsyrǵan bolatyn. Onyń kandidatýrasyn «Qazaqstan áýesqoi fýtbolshylarynyń» qoǵamdyq birlestigi usynǵan.
«Aýmaqtyq sailaý komissiialarynyń hattamalaryna sáikes, qoldaýǵa 58 889 qol jinaldy, tekserý nátijeleri boiynsha 4 054 qol tanyldy. Bul sailaýshylardyń jalpy sanynyń 1%-dan azyn quraidy. Osylaisha, «Sailaý týraly» Konstitýtsiialyq zańnyń 56-baby 2-tarmaǵynyń kandidatty qoldaýǵa sailaýshylar qolynyń qajetti sany týraly talaby oryndalmady», - dedi OSK múshesi Sábila Mustafina otyrys barysynda.
Sonymen birge, OSK múshesi Shavkat Ótemisovtyń aitýynsha, Nurjan Áltaev 2022 jyly 6 qazanda «Muqalmas» respýblikalyq qoǵamdyq birlestiginen kandidat retinde usynyldy. Kandidattyń zańnama talaptaryna sáikestigin anyqtaý úshin tiisti memlekettik organdardan málimetter, sondai-aq lingvistikalyq komissiia qorytyndysy alyndy.
«2022 jylǵy 11 qazanda OSK-ǵa «Muqalmas» respýblikalyq qoǵamdyq birlestiginiń jalpy otyrysynyń QR Prezidenttigine kandidat usyný jónindegi 2022 jylǵy 6 qazandaǵy №19 hattamasynyń qoldanylýyn sot sheshimi zańdy kúshine engenshe toqtatý týraly Astana qalasy Baiqońyr aýdandyq sotynyń 2022 jylǵy 11 qazandaǵy dereý oryndaýdy talap etetin uiǵarymy kelip tústi. Ortalyq sailaý komissiiasynda «QR Sailaý týraly» Konstitýialyq zańynyń 54-baby 2-tarmaǵy negizinde Prezidenttikke kandidattyń Konstitýtsiiada jáne «QR Sailaý týraly» konstitýtsiialyq zańda oǵan qoiatyn talaptarǵa sáikestigin, onyń ishinde kandidatty usyný týraly respýblikalyq qoǵamdyq birlestiktiń joǵarǵy organ otyrysynyń hattamasynan úzindi kóshirme negizinde belgileý ókilettigi berilgen», - dedi Ótemisov.
Ortalyq sailaý komissiiasy sottyń uiǵarymyn oryndai otyryp, 2022 jylǵy 12 qazanda «QR Sailaý týraly» konstitýtsiialyq zańynyń 12-babynyń 17-tarmaqshasyn basshylyqqa ala otyryp, Prezidenttikke kandidat N. Áltaevtyń sáikestigin belgileý rásimin toqtata turǵan bolatyn.
«Muqalmas» respýblikalyq qoǵamdyq birlestiginiń joǵary organynyń 2022 jylǵy 6 qazandaǵy №19 QR Prezidenttigine kandidat retinde N. Áltaevty usyný týraly hattamasy Astana qalalyq Baiqońyr aýdandyq sotynyń 2022 jylǵy 17 qazandaǵy sheshimi boiynsha jaramsyz dep tanylýyna bailanysty Ortalyq sailaý komissiiasynda QR Prezidenttigine kandidat usyný týraly qoldanystaǵy qujaty joq dep tanylady. Sol sebepten Ortalyq sailaý komissiiasy músheleriniń qaraýyna tirkeýden bas tartý týraly tiisti hattama men qaýly jobasy daiyndalyp, usynyldy», - dedi Shavkat Ótemisov.
Otyrysqa qatysýshylar Nurjan Áltaevty QR Prezidenttigine kandidat retinde tirkeýden bas tartý týraly qaýlyny qabyldady.
«Halyq demografiiasy» qoǵamdyq birlestigi atynan usynylǵan Jumatai Áliev sailaýshylardyń qajetti qolyn jinai almady jáne densaýlyq jaǵdaiy talapqa sai kelmedi.
«Jumatai Áliev kandidattyń aktivteri men mindettemeleri týraly deklaratsiiany tapsyrǵany týraly anyqtamany jáne densaýlyq jaǵdaiy týraly meditsinalyq qorytyndyny usyndy. Biraq densaýlyq jaǵdaiy týraly meditsinalyq tujyrymdama talaptarǵa sáikes kelmeidi», - dedi otyrys barysynda QR OSK múshesi Anastasiia Shegortsova.
Spiker aýmaqtyq sailaý komissiialarynyń hattamalaryna sáikes, J. Álievti qoldaý maqsatynda 20 óńirden 187 723 qol jinalǵanyn atap ótti.
«Tekserý nátijesinde 36 776 qol senimdi dep tanyldy. Bul sailaýshylardyń jalpy sanynyń 1%-dan azyn quraidy. Osylaisha, sailaý týraly Konstitýtsiialyq zańnyń 56-baby 2-tarmaǵynyń kandidatty qoldaýǵa sailaýshylar qolynyń qajetti sany týraly talaby oryndalmady», - dedi ol.
OSK músheleri Jumatai Álievti QR Prezidenttigine kandidat retinde tirkeýden bas tartý týraly qaýly qabyldaýǵa daýys berdi.
Aita keteiik, búgin saǵat 18.00-de prezidenttikke úmitkerlerdi tirkeý aiaqtalyp, kandidattar sailaý aldyndaǵy úgit jumystaryna kiristi.
