Foto: Gosaudit.kz
Joǵary aýditorlyq palata tóraǵasy Álihan Smaiylov kóleńkeli ekonomikaǵa qarsy is-qimyl jónindegi memleket saiasatynyń tiimdiligine júrgizilgen memlekettik aýdit nátijelerin tanystyrdy, dep habarlaidy Ult.kz, Kýrsiv mediaǵa silteme jasap.
Álihan Smaiylov ekonomikanyń kóleńkeli sektory eldiń damýyna teris áser etetinin málimdedi. Shaǵyn jáne orta biznestiń ósýine kedergi keltirip, adal básekelestik deńgeiin tómendetetinin, sondai-aq memlekettik biýdjetke túsetin túsimderdi azaitatynyn aitty.
Smaiylovtyń sózinshe, Qazaqstan jalpy ishki ónimdegi kóleńkeli ekonomikanyń úlesin 15%-ǵa deiin tómendetýdi kózdep otyr. 2017 jyly bul kórsetkish 28,8% bolsa, 2023 jyly 17,5%-ǵa deiin tómendegen.
Degenmen júrgizilgen aýdit nátijeleri osy baǵyttaǵy memleket saiasaty sharalarynyń tiimdiligin tejeitin birqatar eleýli kemshilikter bar ekenin kórsetken.
«Máselen, búginde kóleńkeli ekonomikaǵa qarsy is-qimyl salasynda biryńǵai saiasatty qalyptastyrýǵa jáne basqa vedomstvolardyń is-qimylyn úilestirýge jaýapty memlekettik organ joq. Bul fýnktsiialar bastapqyda Qarjylyq monitoring agenttigine bekitilgen, alaida keiinnen olar QMA-nyń erejesinen alyp tastaldy», – deidi Álihan Smaiylov.
Osyndai faktorlar saldarynan jasyryn ainalym kólemi joǵary. Máselen, memlekettik kirister komitetiniń derekteri boiynsha Ortalyq Aziianyń úsh eliniń azamaty Qazaqstanda úsh jyl ishinde 136 mlrd teńge tabys tapqan. Alaida Ulttyq Banktiń aqparaty boiynsha osy ýaqyt ishinde olar óz elderine jalpy 1 trln teńge aýdarǵan. Iaǵni bul tusta «kóleńkeli» taýarlar men kórsetiletin qyzmetter bolý yqtimaldyǵy joǵary bolyp tur.
Aýdit nátijeleri boiynsha barlyǵy 74 mlrd teńge somasyna biýdjettiń kiris bóligi boiynsha janama shyǵyndar, 18 rásimdik buzýshylyq, 23 júieli kemshilik anyqtalǵan.
