Qyrǵyzstandaǵy "Sapat" bilim berý mekemesiniń prezidenti Orhan Inandyny Bishkekten úsh adam urlap, Túrkiiaǵa jetkizgen. Bul jaiynda ol Túrkiiadaǵy advokaty Halil Ibragim Iylmazǵa aityp bergen.
Advokat Azattyqtyń Qyrǵyz qyzmetine bergen suqbatynda Inandy aldymen Bishkekte ustalyp, keiin Túrkiiaǵa jetkizilgen deidi.
"Kimniń urlaǵanyn bilmeidi. Biraq qyrǵyzstandyq adamdardyń urlaǵanyn aityp jatyr. Ol qyrǵyz militsiiasy, qaýipsizdik qyzmeti ne basqa top bolýy múmkin. Áiteýir ony urlaý operatsiiasyna ulty qyrǵyz úsh adam qatysqan. Biraq olardyń kim ekenin bilmeidi. Ony ustaǵan boida, kózin bailap tastaǵan. Kózi tańýly kúide aldymen kólikpen bes-alty saǵat júrgen, sosyn ushaqqa otyrǵyzǵan. Ol qai jaqtan ushaqqa otyrǵyzǵanyn bilmeidi" deidi ol.
Advokaty Inandy ózine taǵylǵan aiyptardy moiyndamaidy deidi. Biraq tergeýdiń barlyq suraqtaryna jaýap berip jatyr. Osyǵan deiin túrik aqparat agenttikteri Inandy ózine taǵylǵan aiyptardy moiyndady dep habarlaǵan.
"Sapat" bilim berý mekemesiniń prezidenti, tegi túrkiialyq Orhan Inandy 1 maýsymǵa qaraǵan túni joǵalyp, sodan beri habarsyz ketken. Ony Túrkiianyń arnaiy qyzmeti ólkege alyp kelgenin prezident Rejep Taiyp Erdoǵan 5 shildedegi halyqqa joldaýynda aitqan.
Osyǵan bailanysty Qyrǵyzstannyń syrtqy ister ministrligi Túrkiiaǵa nota jiberip, qyrǵyz azamatyn urlap ketý halyqaralyq talaptarǵa sáikes kelmeitinin bildirgen.
Erdoǵan biligi Orhan Inandyny "Gúlen" qozǵalysynyń Ortalyq Aziiadaǵy jetekshileriniń biri dep sipattaidy. Inandy joǵalǵannan keiin onyń júzdegen jaqtastary narazylyq aktsiiasyna shyǵyp, qaitarylýyn talap etken.
