Túrkistan oblysy, Ordabasy aýdanynyń jurtshylyǵy dástúrli «Altyn kúz - 2022» merekesin atap ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Atalǵan shara aýdandaǵy aýylsharýashylyq ónimderiniń jármeńkesimen bastaý aldy. Onda sharýalar men diqandar, atalǵan salada júrgen kásip ieleri jurtshylyqqa óz ónimderin usyndy. Sondai-aq asyl tuqymdy tórt túlik ósirýshilerdiń kórmesi de uiymdastyryldy.
2022 jyldyń 9 aiynda aýdanda aýyl sharýashylyǵy salasynda 53 mlrd. 818 mln. teńgeniń ónimi óndirildi. Bul ótken jyldyń tiisti kezeńimen salystyrǵanda 3 mlrd. 446 million teńgege artyq.
Biyl aýdan kóleminde 68 495 gektarǵa aýyl sharýashylyǵy daqyldary egilip, jospar 104 paiyzǵa oryndaldy. Jalpy, 68 myń gektardan astam alqapqa egilgen aýylsharýashylyq daqyldarynan búgingi tańda barlyǵy 245 myń tonnadan astam ónim jinaldy.
Aýdanda 15,7 gektar jerge jylyjai qurylysy júrgizilip, jospar 105 paiyzǵa, tamshylatyp sýǵarý 476 gektar jerge endirilip, jospar 112 paiyzǵa oryndalyp otyr. Sondai-aq jańbyrlatyp sýǵarý júiesi de 500 ga astam alqapqa endirilip, jospar 111 paiyzǵa oryndaldy.
Egistik jerdi tiimdi paidalaný arqyly «1 alqaptan 2-3 ret ónim alý» jobasy da tiimdi júzege asty. Atap aitar bolsaq, 109 sharýa qojalyǵy 363,7 gektarǵa daqyldar men kókónister ekti. Nátijesinde birinshi ónimnen – 7 854 tonna, ekinshi ónimnen 5 698 tonna ónim jinaldy.
Aýdanda mal sharýashylyǵy baǵytynda da ósim baiqalady. Onyń ishinde tórt túliktiń sany artýda. Jyl basynan 7 734 tonna mal men qus eti, 37 861 tonna siyr súti jáne 10 068 myń dana jumyrtqa óndirildi.
