Qazaqstan Respýblikasy bas prokýratýrasynyń «Otbasyndaǵy zorlyq-zombylyqsyz Qazaqstan» pilottyq jobasy aiasynda Ordabasy aýdanynda áleýmettik-psihologiialyq súiemeldeý ortalyǵy ashyldy, dep habarlaidy "Ult aqparat" OQO ákiminiń baspasóz qyzmetine silteme jasap.
Bastamany qolǵa alýdaǵy maqsat – otbasy, oshaqqasynda bolatyn janjaldarǵa tosqaýyl qoiý, shańyraq yntymaǵyn saqtaý.
Ortalyqta erinen zábir kórip, zorlyq-zombylyq taýqymetin tartqandar men ishimdik pen esirtkige salynyp ketkenderge psihologiialyq qoldaý kórsetiletin bolady. Ortalyqtyń saltanatty ashylýyna aýdan ákimi A.Mamytbekov, Qazaqstan Respýblikasy bas prokýrorynyń aǵa kómekshisi S.Tursynbekova, aýdan prokýrory B.Býleýliev arnaiy qatysyp, pilottyq jobanyń mańyzdylyǵyna toqtaldy.
– Ishki ister bólimderine otbasy ishindegi janjaldardyń zardabyn tartqandar kóptep aryzdanyp jatady. Bul búgingi qoǵamymyzdyń álsiz tusy desek, qatelespeimiz. Zorlyq-zombylyqtyń saldarynan búginde qoǵamda túrli keleńsizdikter oryn alýda. Shańyraqtar shaiqalyp, panasyz balalar kóbeidi. Durys keńes, kómek ala almaǵan qyzdar sharanalaryn dalaǵa tastaityn boldy. Qoǵamymyzdyń moraldik quldyraýyna jol bermeý maqsatynda ashylǵan búgingi sektor ózine júktelgen mindetti tiisti deńgeide atqarady dep senemiz,- dedi aýdan ákimi A.Mamytbekov.
Óz kezeginde «Otbasyndaǵy zorlyq-zombylyqsyz Qazaqstan» pilottyq jobasynyń jetekshisi S.Tursynbekova sóz alyp, ortalyqtyń jumys aýqymyn túsindirdi.
– Búginde barlyq qyzmet túrleri oblys ortalyǵynda ornalasqan. Osyndai ortalyqtardy aýdandardan ashýdaǵy negizgi maqsatymyz – aýyl turǵyndaryna kómek qolyn sozý bolatyn. Biz aýyl turǵyndarynyń jan-aiqaiyn, negizgi máselelerinen habardar bolyp otyrýymyz qajet. Búginde otbasylyq jaǵdaida turmystyq zorlyq-zombylyqtyń beleń alǵan kezeńi. Sondyqtan osyndai ortalyqtar túrli jaǵdaida qiyndyqqa dýshar bolǵan áielder qaýymyna kómek kórsetetin bolady, – dedi joba jetekshisi.
Aýdandyq áielder keńesiniń tóraiymy M.Záitúnqyzy osy baǵytta analar alqasynyń atqarǵan jumystaryn aityp ótti. Bas prokýratýranyń bastamasymen ashylǵan sektor ǵimaraty qajetti bólmelermen qamtamasyz etilgen.
