Shymkenttiń «Ordabasy» klýby fýtboldan Qazaqstan kýboginiń iegeri atandy, dep habarlaidy QazAqparat.
Finalda Oraldyń «Aqjaiyǵy» men Shymkenttiń «Ordabasy» komandalary kezdesti. Oraldyq fýtbolshylar matchty óte senimdi bastady. Oiynnyń 7-minýtynda Zaven Badoian esep ashsa, 10-minýtta Toma Tabatadze esepti ústemelei tústi.
Shymkenttik klýb sapynan Samat Shámshi 26-minýtta baspen gol soǵyp, esep aiyrmasyn qysqartsa, 51-minýtta Vsevolod Sadovskii tarazy basyn teńestirdi.
Odan keiin 67-minýtta Toma Tabatadze, 74-minýtta Maksim Kalenchýk gol soǵyp, «Aqjaiyq» basymdyqty qaitadan eki golǵa jetkizdi.
Al «Ordabasy» sapynan Maksim Fedin 76, Lýish Gedesh 98-minýttarda mergendik tanytyp, esep qaita teńesti.
Kezdesýdiń negizgi kezeńi 4:4 esebimen teń aiaqtalyp, oiyn overtaimǵa ulasty.
Oiynnyń 117-minýtynda Elhan Astanov oraldyq klýb qaqpasyna belgilengen penaltiden múlt ketken joq.
Osylaisha, qarsylasyn 5:4 esebimen jeńgen «Ordabasy» óziniń tarihynda ekinshi márte kýbokti tóbesine kóterdi. Buǵan deiin olar 2011 jyly Qazaqstan kýbogine ie bolsa, 2007 jyly finalda Qostanaidyń «Tobylyna» ese jibergen edi.
Atalǵan týrnir 1992 jyldan beri turaqty ótkizilip keledi.
