"ورداباسى" قازاقستان كۋبوگىنىڭ جەڭٸمپازى اتاندى

شىمكەنتتٸڭ «ورداباسى» كلۋبى فۋتبولدان قازاقستان كۋبوگٸنٸڭ يەگەرٸ اتاندى, دەپ حابارلايدى قازاقپارات.

فينالدا ورالدىڭ «اقجايىعى» مەن شىمكەنتتٸڭ «ورداباسى» كوماندالارى كەزدەستٸ. ورالدىق فۋتبولشىلار ماتچتى ٶتە سەنٸمدٸ باستادى. ويىننىڭ 7-مينۋتىندا زاۆەن بادويان ەسەپ اشسا, 10-مينۋتتا توما تاباتادزە ەسەپتٸ ٷستەمەلەي تٷستٸ.

شىمكەنتتٸك كلۋب ساپىنان سامات شەمشٸ 26-مينۋتتا باسپەن گول سوعىپ, ەسەپ ايىرماسىن قىسقارتسا, 51-مينۋتتا ۆسەۆولود سادوۆسكيي تارازى باسىن تەڭەستٸردٸ.

ودان كەيٸن 67-مينۋتتا توما تاباتادزە, 74-مينۋتتا ماكسيم كالەنچۋك گول سوعىپ, «اقجايىق» باسىمدىقتى قايتادان ەكٸ گولعا جەتكٸزدٸ.

ال «ورداباسى» ساپىنان ماكسيم فەدين 76, لۋيش گەدەش 98-مينۋتتاردا مەرگەندٸك تانىتىپ, ەسەپ قايتا تەڭەستٸ.

كەزدەسۋدٸڭ نەگٸزگٸ كەزەڭٸ 4:4 ەسەبٸمەن تەڭ اياقتالىپ, ويىن وۆەرتايمعا ۇلاستى.

ويىننىڭ 117-مينۋتىندا ەلحان استانوۆ ورالدىق كلۋب قاقپاسىنا بەلگٸلەنگەن پەنالتيدەن مٷلت كەتكەن جوق.

وسىلايشا, قارسىلاسىن 5:4 ەسەبٸمەن جەڭگەن «ورداباسى» ٶزٸنٸڭ تاريحىندا ەكٸنشٸ مەرتە كۋبوكتٸ تٶبەسٸنە كٶتەردٸ. بۇعان دەيٸن ولار 2011 جىلى قازاقستان كۋبوگٸنە يە بولسا, 2007 جىلى فينالدا قوستانايدىڭ «توبىلىنا» ەسە جٸبەرگەن ەدٸ.

اتالعان تۋرنير 1992 جىلدان بەرٸ تۇراقتى ٶتكٸزٸلٸپ كەلەدٸ.