Ońtústik Qazaqstan oblysynyń «Ordabasy» fýtbol komandasynyń oiynshylary kieli Otyrar jerinde boldy. Otyrar aýdanynyń ákimi Erlan Aitahanovtyń arnaiy shaqyrtýymen kelgen aiaqdopshylar Arystan bab kesenesin aralap kórdi, dep habarlaidy QazAqparat tilshisi.
Elbasymyz N. Nazarbaevtyń elimizde buqaralyq sportty damytý jóninde baǵdarlamalyq tapsyrmalar bergeni belgili. Osy rette fýtboldan el birinshiliginde oblystyń namysyn qorǵap júrgen «Ordabasy» klýbynyń múshelerin qonaqqa shaqyrǵan aýdan ákimi Erlan Aitahanov sportshylardy qaqpadan kútip alyp, búginde Otyrardyń brendine ainalǵan shubat usyndy.
Bas qaqpada az-kem aialdaǵan qonaqtar birden Arystan bab áýlieniń kesenesine bet túzedi. Mysyr jerindegi ǵulama babamyz - Ábý Nasyr ál-Farabi men dańqty qolbasshy Sultan Beibarystyń zirattarynan ákelinip, topyraqtary osynda qoiylǵan keshenmen tanysty.
Qasietti juma kúnimen tuspa-tus kelgen saparda qonaqtar Arystanbab kesenesinde Quran oqyp, niet bildirip, qurban shaldy. Munan soń qurmetti qonaqtar arnaiy jaiylǵan dastarhan basynda bas qosyp, kóterińki kóńil-kúi syilaǵan kontserttik baǵdarlamany tamashalady. Basqosýda «Ordabasy» klýbynyń prezidenti Baqtiiar Baiseiitov aýdan basshysyna osy kezdesýdi uiymdastyrǵany úshin klýb músheleriniń atynan rizashylyǵyn jetkizip, Erlan Qýanyshulyna «Ordabasy» fýtbol klýbynyń qos jeidesi men otyrarlyqtarǵa arnalǵan kádesyiyn tabystady.
Aýdan ákimi óz kezeginde negizgi qurammen kelgen komandaǵa alǵysyn aita otyryp, otyrarlyqtardyń atynan Baqtiiar Daniiaruly bastaǵan Aleksei Petrýshin, Aitqul Aqynbaev, Samat Smaqov, Timýr Iksanov, Pavel Pishýlinderdiń iyqtaryna shapan jaýyp, syi-qurmet kórsetti.
Munan keiin sportshylar «Rýhaniiat-Ábý Nasyr ál-Farabi» mýzeiin aralap, taǵylymy mol tarihi qundylyqtarmen tanysty. Jýrnalister men fýtbol jankúierlerine arnap baspasóz konferentsiiasyn ótkizdi.
Klýb prezidenti qoiylǵan suraqtarǵa tolyqqandy jaýap berdi. Memlekettik Ánuran avtorlarynyń biri, kompozitor Shámshi Qaldaiaqovtyń týǵan jerindegi «Alpamys batyr» atyndaǵy sport kesheninde «Ordabasynyń» negizgi quramy men Otyrar aýdanynyń quramasy joldastyq kezdesý ótkizdi.
Buqaralyq sportty damytý, jastardyń aiaqdopqa degen qyzyǵýshylyǵyn arttyrý maqsatynda ótken oiynda jeńis tórine dostyq pen yntymaq shyqty.
