Túrkistan oblysynyń ákimi Darhan Satybaldy Ordabasy aýdanyna is-sapary barysynda birqatar kásiporyndy aralap, jumysymen tanysty, dep habarlaidy «Ult aqparat» oblys ákimdiginiń baspasóz qyzmetine silteme jasap.
Indýstrialdy aimaqty keńeitý, damytý joldaryn qarastyryp, mamandarmen, kásipkerlermen keńesti. Óńir basshysy Ordabasy aýdanynda óndiristi damytýǵa kúsh salynatynyn jetkizdi.
«Ordabasy aýdanynda óndiristi damytýǵa múmkindik mol. Indýstrialdy aimaq qolaily aýmaqta ornalasqan. Biz indýstrialdy aimaqty odan ári keńeitip, kásiporyndar ashýǵa kúsh salamyz. Infraqurylym máselesi tolyq sheshiledi. Investorlar men kásipkerlerge qoldaý kórsetýge daiynbyz», – dedi Darhan Satybaldy.
Búginde Ordabasy aýdanynda «Standart Resýrsis» JShS-niń munai óńdeý zaýyty jumys istep tur. Óndiris ornynyń qurylysy 2020 jyly aiaqtalǵan. Jumysynyń II kezeńin biylǵy jyldyń ekinshi jartyjyldyǵynda iske qosqan. Jylyna 100 myń tonna shikizat óndiredi. Joǵary markaly benzinnen bastap, birneshe ónim shyǵarylady. 200-ge jýyq adam jumyspen qamtylǵan. Olardyń ortasha ailyǵy 120-150 myń teńgeni quraidy. Kómir-himiia zaýytynyń áleýetin mamandar joǵary baǵalap otyr.
Óńir basshysy odan keiin polietilen buiymdaryn qaita óńdeitin jáne sintepon talshyǵyn óndiretin «GREEN TECHNOLOGY INDUSTRIES» zaýytynda boldy. Badam aýylyndaǵy «Badam» indýstriialdy aimaǵynda ornalasqan zaýyttyń investitsiialyq quny – 6800,0 mln. teńge. Jobanyń I kezeńi PET qaldyqtaryn tazartý jáne usaqta týrap fleks ónimin alý jobasy 2018 jyly «Údemeli indýstrialdy-innovatsiialyq damý» memlekettik baǵdarlamasy aiasynda iske qosyldy. 2018 jyldan beri shyǵarylyp jatqan fleks ónimi Resei federatsiiasyna eksporttalýda. Qos óndiris ornyn aralap kórgen Darhan Satybaldy kásipkerlikke qoldaý baǵytyndaǵy jumystar jandanatynyn aitty. Indýstrialdy aimaqtyń káriz júiesin retteý máselesi mańyzdy ekenin atap ótti.
Jumys saparynda oblys ákimine «2021-2025 jyldarǵa arnalǵan kásipkerlikti damytý» ulttyq joba aiasynda memlekettik grant arqyly qarjylandyrylyp, kásibin ashqan azamattar men taýar óndirýshilerdiń kórmesin kórmesi usynylyp, jobalar tanystyryldy.
Ordabasy aýdanynda «Biryńǵai indýstriialandyrý kartasy» aiasynda 2022-2025 jyldary jalpy investitsiialyq quny 105,7 mlrd. teńge bolatyn jáne barlyǵy 1060 jańa jumys ornyn quratyn 6 jobany iske asyrý josparlanǵan. Biyl 3 joba iske qosyldy. Al, «Badam» indýstrialdyq aimaǵynda jalpy quny 21 mlrd. 234 mln. teńgeni quraityn 6 joba ornalasqan.
Aýdanda ónerkásip salasynda 9 aida 21 mlrd. 190 mln. teńgeniń ónimi óndirilip, aldyńǵy jyldyń tiisti kezeńimen salystyrǵanda 804 mln. teńgege, al naqty kólem indeksi 0,3%-ǵa artty. Jyl qorytyndysymen mejelengen 28 mlrd. teńgeniń ónimi óndirilmek. Ordabasy aýdanyna 9 aida 26 mlrd. 251 mln. teńge investitsiia tartyldy. Bul aldyńǵy jyldyń tiisti kezeńimen salystyrǵanda 10 mlrd. 955 mln. teńgege artyq. Sonyń ishinde jeke investitsiialar – 14 mlrd. 851 mln. teńge.
