© Astana qalasynyń ákimdigi
Elimizde aýtizmge shaldyǵatyn balalardyń kóbeiýi osy baǵytta ońaltý ortalyqtarynyń sanyn da arttyrýdy qajet etýde. Osyǵan orai Astanada memlekettik tapsyryspen erekshe balalarǵa tegin qyzmet kórsetetin "OrdaAutism" túzetý ortalyǵynyń tórtinshi filialy ashyldy, dep habarlaidy qalalyq ákimdiktiń resmi saity.
Onyń ashylýyna Astana qalasy Ishki saiasat basqarmasynyń basshysy Nurdáýlet Álmuhanov, Astana qalasy Jumyspen qamtý jáne áleýmettik qorǵaý basqarmasynyń basshysy Ilia Skýb qatysyp, jańa ujym jumysyna sáttilik tiledi.
Ortalyqty 2016 jyldan beri jumys isteitin Astana qalalyq "Orda" aýtizmi bar balalar ata-analarynyń qoǵamdyq birlestigi ashyp otyr. Buǵan deiin olar ashqan 3 ortalyq jylyna 500-den astam balany túzetý jáne ońaltýmen ainalysatyn. Munda ǵylymi dáleldengen, eń tiimdi, zamanaýi ádistemeler qoldanylady jáne arnaiy daiyndyqtan ótken mamandar jumys isteidi. Erekshe balǵyndardyń ata-analaryna da psihologiialyq qoldaý kórsetiledi.
Jańa ǵimaratta aýtizmge shaldyqqan balalardy ońaltý men túzetýdiń tyń formattary engizilgen, mekeme jumysy osy rette zamanaýi mashyqtar men áleýmettendirýge qol jetkizýge baǵyttalǵan. Onyń ashylýy úshin qanshama resýrs pen kúsh salyndy. Osyǵan orai ortalyq basshysy Astana qalasy Jumyspen qamtý jáne áleýmettik qorǵaý basqarmasyna 7 jyl boiy seriktes bolyp kele jatqany úshin alǵys bildirdi.
800 sharshy metr aýmaqty alatyn jańa ortalyqta tolyǵymen jabdyqtalǵan 20-dan astam kabinet bar. Bul jerde logopedter, defektologtar, psihologtar, beiimdeý dene tárbiesi boiynsha nusqaýshylar, mýzyka terapiia mamandary jáne taǵy basqa sala qyzmetkerleri jumys isteidi. Balalardyń úiine baryp, áleýmettik qyzmet kórsetetin mamandar da bar.
Ortalyqtyń buǵan deiingi úsh filialy Turan, 9, B.Mailin, 21 jáne Á.Bókeihan, 25V mekenjailary boiynsha ornalasqan bolsa, jańadan ashylǵan filial ǵimaraty Kenesary, 80 mekenjaiynda ornalasqan.
