Astanada turatyn oralmandar memleketten beriletin úi kezeginen alynyp tastalýy múmkin. Sondai-aq bul tizimnen áskeri qyzmetkerlerdi de shyǵarý máselesi kóterilip otyr, dep habarlaidy Elorda.info.
Qalalyq turǵyn úi basqarmasynyń basshysy Rýslan Ahmetov máslihattyń turaqty komissiiasynyń otyrysynda memlekettik qordan baspana alýǵa kezekte turǵan oralmandardy tizimnen shyǵarý usynysy jasalǵanyn atap ótti.
«Biz Úkimetke birneshe márte usynys jasadyq, áli de atalǵan sanattaǵy turǵyndardy kezekten shyǵarý kerek degen pikirdemiz. Qazir bizdiń usynysymyz Úkimette qyzý talqylanyp jatyr», - dedi Rýslan Ahmetov.
Onyń aitýynsha, óńirlerdiń birine kvotamen kelgen oralmandar baspananyń ornyna aqshalai ótemaqy alady da, Astanaǵa qonys aýdaryp, turǵyn úige kezekke turady eken. Al onyń ótemaqy alǵany derekter bazasyna tirkelmeitin kórinedi.
Sondai-aq áskeri qyzmetkerlerdi turǵyn úi kezeginen shyǵarý máselesi de ótkir tur. Olar endi jeke tizimge alynyp, basqa jeńildiktermen qamtylady.
Basqarma basshysy múlikti ieliginen shyǵaryp, bes jyldan soń páterge qaita kezekke turatyndardyń da joly kesiletinin aitty.
«Eger adam memleket qorynan bir ret páter alsa, onyń qaita kezekke turý quqyǵyn shekteý qajet», - dep atap ótti ol.
