Rejisser Sábit Qurmanbekovtiń «Oralman» kórkem filmi Italiiada ótken HH Halyqaralyq «Religion Today» («Búgingi din») kinofestivalinde «Úzdik film» júldesimen marapattaldy. Sonymen qatar, atalǵan týyndy SIGNIS táýelsiz qazylar alqasynyń arnaiy júldesine qol jetkizdi (Kommýnikatsiia jónindegi álem katolikteri assotsiatsiiasynyń júldesi).
Qazaqstan Respýblikasy Mádeniet jáne sport ministrliginiń tapsyrysy boiynsha Sh.Aimanov atyndaǵy «Qazaqfilm» kinostýdiiasy túsirgen atalmysh film týǵan jerinen ketýge májbúr bolǵan, alaida ondaǵan jyldar ótken soń Aýǵanstannan eline qaita oralǵan qandastarymyz jaily baiandaidy.
Biyl halyqaralyq «Religion Today» kinofestivaliniń negizgi baiqaýynda 28 elden 41 tolyqmetrajdy kartina baq synady. Festivaldiń úzdik filmderin halyqaralyq qazylar alqasy anyqtady. Olardyń quramynda rejisser Bendjamin Freidenberg, serbiialyq rejisser Goran Radovanovich, «Kinodaǵy bosqyndardyń úni» baǵdarlamasynyń direktory Bernadett Shramm jáne basqalar.
Festivaldiń Bas júldesi italiialyq rejisser Ermanno Olmanyń «Kórdińder me, men de sender siiaqtymyn» atty kartinasyna buiyrdy. «Úzdik qysqametrli film» júldesin Lýiza Roýzdyń «Chop» filmi ielendi, al «Úzdik derekti film» júldesi irandyq rejisser Berýz Nýranipýrdyń «A 157» atty filmine berildi.
Odan bólek, festivalde halyqaralyq qazylar alqasymen birge SIGNIS táýelsiz qazylar alqasy jumys istedi. Onyń quramynda Matteo Asti (Italiia), Gýido Konventes (Belgiia), Blanka Mariia Monzon (Argentina) jáne Magali Van Reet (Frantsiia) boldy.
Táýelsiz qazylar alqasynyń músheleri «Oralman» filminiń rejisseri Sábit Qurmanbekovke airyqsha alǵystaryn bildirip, bylai dedi: «Bul film Ortalyq Aziiadaǵy eń keremet filmderdiń biri. Qariianyń atajurtyna degen mahabbaty ádemi beinelengen. Eger de ár bosqynnyń júreginde ata jurtqa oralýǵa degen úmit bolsa, qiyndyqtarǵa qaramastan, maqsatyna jete alady».
Esterińizge sala ketsek, «Oralman» kórkem filmi osy jyldyń basynda Irannyń astanasy Tegeranda ótken 35-shi Halyqaralyq Fadjr kinofestivali men XIII Halyqaralyq «Eýraziia» kinofestivaliniń Bas júldesin jeńip alǵan bolatyn. Filmde basty róldi somdaǵan akter Dýlyǵa Aqmolda qyrkúiek aiynda Tatarstanda ótken XIII Halyqaralyq musylmandar kinosy festivalinde «Úzdik er adam róli» júldesimen marapattaldy.
Aita ketsek, «Oralman» kórkem filmi halyqaralyq prokatqa shyǵyp, shetelderde kórsetilip júr. Bul filmdi birinshi bolyp Avstraliianyń talǵampaz kórermenderi tamashalady. Kelesi jyldyń basynan bastap «Oralman» filmi Italiiada prokatqa shyǵatyn bolady.
