Oralda jergilikti turǵyndar qala ákimi Abat Shynybekovtiń otstavkaǵa ketýin talap etip, petitsiia jazdy, - dep habarlaidy Tengrinews.kz tilshisi Moi GOROD saityna silteme jasap.
27 naýryzda egov.press saitynda jariialanǵan petitsiiaǵa 11 938 adam qol qoiǵan.
"Oral qalasynyń ákimi Abat Shynybekovtiń otstavkaǵa ketýin talap etemiz. Abat Shynybekov qala ákimi bolyp taǵaiyndalǵannan keiin qala basshysyz qalǵan siiaqty. Halyq onyń jumysyna narazy, qalada jol-jóndeý jumystary nashar júrgizilip jatyr. Únemi apat bolyp turady. Qala ai saiyn sýsyz qalady. Osylai jalǵasa berse, qala turǵyndarynyń ákim jumysyna narazylyq kórsetetin sebepteri jeterlik", - delingen petitsiia mátininde.
Ótinish avtorynyń pikirinshe, máseleni tek Memleket basshysy sheshe alady. Qala ákiminiń baspasóz qyzmeti jaǵdaidy keiinirek túsindirýge ýáde berdi.
Abat Shynybekov 1973 jyly týǵan. Batys Qazaqstan Aýyl sharýashylyǵy institýtyn "Aýyl sharýashylyǵyn mehanikalandyrý" mamandyǵy boiynsha jáne "Eýraziia" tilder jáne menedjment institýtyn "Ekonomika jáne menedjment" mamandyǵy boiynsha bitirgen.
1996 jyldan 2003 jylǵa deiin memlekettik qyzmette túrli jumys istedi. 2003-2006 jyldary Kaztalov aýdany ákiminiń orynbasary boldy. 2007-2008 jyldary - Oral ákiminiń keńesshisi. 2008-2012 jyldary - "Nur Otan" BQOF tóraǵasynyń orynbasary. Birneshe jyl Oral qalalyq máslihatynyń hatshysy boldy. 2013-2017 jyldary - Syrym aýdanynyń ákimi. 2017 jyly Kaztalov aýdanynyń ákimi bolyp, 2019 jylǵy tamyzda Oral qalasynyń ákimi bolyp taǵaiyndaldy.
