Batys Qazaqstan oblysynda shyǵatyn "Ýralskaia nedelia" gazetiniń jýrnalisi Luqpan Ahmediarov óziniń qylmystyq kodekstiń 378-baby ("Bilik ókiline til tigizý") boiynsha sotaldy tergeýge tartylǵanyn habarlady.
Ahmediarovtyń Azattyqqa aitýynsha, 22 shilde, demalys kúni Oraldan qashyqqa ketken kezinde uialy telefonyna ózin politsiia qyzmetkeri Turmanov dep tanystyrǵan adam qońyraý soǵyp, jýrnalistiń buryn jasaǵan ákimshilik quqyq buzý áreketi boiynsha hattama toltyrý úshin politsiiaǵa kelip ketýin suraǵan.
- Onyń sózi túsiniksizdeý bolǵandyqtan, iaǵni ol meniń qaladan jyraqta ekenimdi túsinbegendikten oǵan qaladan alysta ekenimdi jáne qazir bara almaitynymdy qaitalaýǵa májbúr boldym. Al ol qalaida kelýimdi talap ete bastaǵan soń oǵan "ketshi ármen" degen syńaida sóz aityp qoidym, - dedi Ahmediarov Azattyqqa.
Jýrnalistiń sózinshe, 9 tamyzda óziniń ústinen aryz jazǵan Oral qalalyq №8 politsiia pýnkktiniń ýchaskelik politseii Ádil Turmanovpen telefondaǵy áńgimesin aýdio taspaǵa jazýdyń zańdylyǵyn dáleldeýdi suraǵan shaǵymyna jaýap berýge ózin politsiiaǵa shaqyrǵan. Ahmediarov ázirge óziniń is boiynsha kýáger ekenin aitady.
Politsiia Luqpan Ahmediarov aitqan aqparatty joqqa shyǵaryp, ia rastamady. Oral qalalyq ishki ister basqarmasynyń baspasóz hatshysy Gúlaman Ysmaǵulova telefon arqyly kommentarii berýge ýáde bergenimen, sol kúii bailanyspady. Ádil Turmanovtyń jumys telefonyna eshkim jaýap bermedi.
Qylmystyq kodeks boiynsha, "bilik ókiline til tigizgeni" úshin 100 ailyq eseptik kórsetkish kóleminde aiyppul salynyp, 120 saǵatqa deiin qoǵamdyq jumysqa tartylý nemese 45 ákimshilik qamaýǵa alý jazasy kesiledi.
Luqpan Ahmediarov 2012 jyly qastandyq jasalyp, tiri qalǵan. Ahmediarov pen onyń advokattary qastandyqty onyń azamattyq belsendiligi men kásibi qyzmetimen bailanystyrady. Ahmediarovty buǵan deiin kúsh qurylymdarynyń sheneýnikteri birneshe ret sotqa berip, iri kólemde aiyppul tóleýge májbúrlegen.
Sanat Oryn Áli, "Azattyq"
