Oralda úsh avtomobildi urlaǵan 8 jasar Nikolai Kertsman pedagogtar qadaǵalaityn tehnikalyq úiirmege berildi, dep habarlaidy jergilikti «Moi gorod» portaly.
Ekinshi synyp oqýshysy endi urlyq jasamaýǵa ýáde berdi.
Bala oqityn mekteptiń direktory men synyp jetekshisiniń aitýynsha, Nikolai aýqatty otbasynyń balasy. Onyń mundai áreketke barýyna ózinen 4 jas úlken Nikita sebep bolýy múmkin.
«Nikita maǵan mashinaǵa min dedi. Biraq ózi otyrǵan joq. Men mashinaǵa minip, aidap kettim. Jaman is istegenimdi bilemin, basqa bulai etpeýge ýáde beremin», - deidi Nikolai.
Otyrys qorytyndylary boiynsha, komissiia balanyń ata-anasyn QR Ákimshilik quqyq buzýshylyqtar týraly kodeksiniń 127-babyna («Ata-ananyń nemese basqa da zańdy ókilderdiń balalardy tárbieleý jónindegi mindetterdi oryndamaýy») sáikes ákimshilik jaýapqa tartýǵa uiǵardy. Osy jaǵdai endigári qaitalansa, ata-ana quqyǵynan aiyrylýy múmkin.
Al Nikolaidy joǵary synyp oqýshylarymen jolyqtyrmaýǵa sheshim qabyldandy. Budan bólek, qalalyq bilim bólimine balany tehnikalyq úiirmege berý tapsyryldy. Ol jerde Nikolai pedagogtardyń qadaǵalaýynda tehnikanyń qyr-syryn úirene alady.
Is materialdaryna qaraǵanda, Nikolai bir aptada úsh avtomobildi urlaǵan. 6 tamyz kúni keshkisin «Sýzýki» avtomobilin urlap, jolda «Lada Grantaǵa» soqtyǵysyp, toqtaǵan. 9 tamyzda Nikolai kezekti ret «ańǵa» shyǵyp, «Toiota» markaly avtomobildi qoldy etpek bolǵan. Biraq jolda kólikti kópirdiń baǵanasyna soqqan. Úshinshi ret «Hyundai» jeńil kóligin aidap ketken. Bul joly da rýldi basqara almai, beton tosqaýylǵa baryp soǵylǵan.
Abyroi bolǵanda, balanyń urlyǵynan eshkim zardap shekpegen. Biraq endi ákesi 1,4 million teńge mólsherinde materialdyq zalaldy tóleýge mindetti.
Bir aita keterligi, mektep direktorynyń aitýynsha, Nikolai sabaqty jaqsy oqidy.
