Oraldaǵy Eýraziia dańǵylyna uly Abaidyń esimin berý usynyldy, dep habarlaidy "Ult aqparat".
Búgin Oral qalalyq onomastikalyq nysandardyń tarihi jáne dástúrli ataýlaryn qalpyna keltirý boiynsha usynystardy zerdeleý jáne pysyqtaý jónindegi jumys tobynyń keńeitilgen otyrysy bolyp, onda atalǵan másele biraýyzdan qoldaý tapty.
Jiyndy júrgizgen qala ákimi Abat Shynybekovtiń atap ótkenindei, Prezident Qasym-Jomart Toqaevtyń tapsyrmasyna sáikes biyl Abaidyń 175 jyldyǵy keńinen toilanýda.
Keshe Abaidyń mereitoiyna arnalǵan sharalar Oral tórinde saltanatpen ashylsa, búgin Qazaqstan Jazýshylar odaǵy BQO filialynan Eýraziia dańǵylyna Abaidyń esimin berý týraly usynys tústi.
«Memleket basshysynyń tapsyrmasymen, halyqtyń qoldaýymen Abaidyń 175 jyldyǵy elimizde joǵary deńgeide atalyp ótilýde. Barlyq ulttyń ulylary siiaqty, Abaidyń da esimin jańǵyrta berýge tiispiz. Abai qai ǵasyrda da jasai beredi, ol máńgilik. Keńes dáýirinde Abaidyń ákesi Qunanbai bai bolǵandyqtan, tórge oza almady. Aqyn dep aitylǵanmen, ulttyń uly perzenti retinde tanylǵan joq. Endi elimiz táýelsiz bolǵannan keiin Oraldaǵy kúretamyr kósheniń biri – Eýraziia dańǵylyn Abaidyń esimimen atasaq, jarasady dep senemiz», dedi belgili aqyn, Memlekettik syilyqtyń iegeri, Qazaqstan Jazýshylar odaǵy BQO filialynyń basshysy Aqushtap Baqtygereeva.
A.Baqtygereevany filologiia ǵylymdarynyń doktory, professor Murat Sabyr, Oral qalalyq qoǵamdyq keńesiniń tóraǵasy Baqytjan Nurbaev, «Iaik-Ýral kazaktary odaǵy» qoǵamdyq birlestiginiń jetekshisi Viacheslav Solodilov, shahardaǵy №17 orta mekteptiń direktory Tamara Rýdich jáne basqalar qoldady.
Usynysty jiynǵa qatysqan atalǵan jumys toby men qalalyq qoǵamdyq keńes músheleri, qalalyq máslihat depýtattary da maquldady.
