Oralda kelin, Ońtústik Koreiadaǵy kúieý men Kókshetaýdaǵy ata-ana. Mine osyndai jaǵdaida qazaqstandyqtan zoom-platformasy arqyly toi jasady, dep habarlaidy QazAqparat.
Dúisenovtar otbasynda úsh bala bar. Eki ul men Qorlan atty bir qyz bar. Qorlandy búkil qazaqy dástúrmen uzatý josparlanǵan edi. Dýmandy jiyn men toi kóilegin boijetkenniń ózi de ańsaǵan bolatyn. Toidyń ótetinin ótken jyly josparlap qoiyp, tipti toihanamen de kelisilgen. Artynsha toi shildege shegerilipti. Aqyry eldegi ahýalǵa bailanysty toi ótpei qalǵan.
«Kóilekti astanadan aldyrdym. Bári daiyn edi. Alaida pandemiiaǵa bailanysty toidy ótkizbeý týraly sheshim qabyldandy», - deidi Qorlan Dúisenova.
Toi 17 shildede ótýi tiis edi. Meiramhanaǵa aldyn ala tólem júrgizilip qoiǵan. Qonaqtar da aldyn ala shaqyrylǵan. Shamamen 180-200 adamnyń keletini josparlanǵan. Áitse de toi eń jaqyn týǵan-týystyń qatysýymen ótkizilip otyr.
Pandemiia búkil jospardy buzǵanymen toi ótkizýge kedergi keltire almapty. Kókshetaý, Nur-Sultan, Almaty, Ońtústik Koreia – el ishi men sheteldegi qonaqtyń barlyǵy zoom-platformasy arqyly jastardy quttyqtady.
«Kúieý balamen internet arqyly tanysqanbyz. Toi baǵdarlamasyn bárine WhatsApp arqyly joldadyq. Asaba onlain-toidy tuńǵysh ret ótkizse de birden alyp ketti. Bári keremet boldy», - deidi Qorlannyń anasy Nurgúl Qazimova.
Qorlannyń ata-anasy bári de qazaqy jolmen ótýi kerektigin qalapty.
«Quda túsý, syrǵa salý... Izinshe bárimiz de ortaq oiǵa kelgen jón dep sheshtik. Onlain toiǵa bári kelisti. Áý basta onlain-toi týraly ázildese áńgime aitatyn edik. Biraq keiin shynynda da ony ótkizýge bolatynyn bildik. Syrǵany aldyn ala joldady. Jeńgelerim dástúrge sai bólmeme kirip, syrǵamdy taǵyp berdi», - deidi Qorlan Dúisenova.
Nurgúl Qazimova qudalar tarapynan da qarsylyq bolmaǵanyn aitady.
«Basynda táýekelge baryp qaitemiz dep oilaǵan edik. Qudalarymyz Kókshetaýdan kelýi kerek edi. Poiyzben kóp adamnyń keletini josparlanǵan. Onlain ótkizý týraly usynysqa olar da kelise ketti», - deidi ol.
Kúieý bala Kókshetaýdan eken. Ákesi qudalaryn birinshi ret onlain kórip otyr. Salt boiynsha jastardyń úi bolý týraly talap-tilegin oryndaýdy suraidy. Jastar Nazarbaev Ýniversitetinde tanysypty. Ondaǵy oqýdy aiaqtaǵannan keiin álemniń eki elinde oqýlaryn jalǵastyrypty. Qorlan Amerikada bolsa, joldasy Ońtústik Koreiada.
Qorlannyń aitýynsha kúieýiniń elge kelýge múmkindigi bolǵan. Biraq Ońtústik Koreiadan shyqqanǵa deiin, shyqqannan keiin eki ret PTR-test tapsyryp, 14 kúndik karantinge jatqyzylatyndyqtan ýaqyt ótip ketedi.
«Áýejailar qaýipti bolyp tur. Sol sebepti táýekelge barmaǵan jón dep sheshtik», - dedi Qorlan.
Bir aidan keiin Qorlan Ońtústik Koreiaǵa barady. Ol himiia ǵylymdarynyń doktory dárejesin alýdy kózdeidi eken. Sondaǵy elshilikte jastar nekeni tirkeýdi josparlap otyr. Al qudalasqan qudalar eldegi epidemiologiialyq ahýal jaqsarǵannan keiin kórispek.
