Oral qalalyq sotynda BQO boiynsha qylmystyq-atqarý júiesi departamenti RÝ-170/1 mekemesiniń qyzmetkerlerine qatysty úkim shyqty, dep habarlaidy QazAqparat.
Sýdia Maǵira Qitarova jariia etken úkimge sáikes, RÝ-170/1 mekemesi rejim jáne kúzet bólimi bastyǵynyń orynbasary, 1992 jylǵy Serjan Ótegenov, qaraý tobynyń ýákiletti ókilderi: 1993 jylǵy Samarhan Saltaev, 1994 jylǵy Darhan Baitoriev jáne baqylaýshy, 2000 jylǵy Alpamys Kenjesh QR QK 146-baby 2-bóligi 1-tarmaǵymen (aldyn ala sóz bailasý arqyly adamdar tobymen jasalǵan azaptaýlar) aiypty dep tanyldy.
S. Ótegenov pen S. Saltaev 4 jylǵa bas bostandyǵynan aiyrý jazasyn shartty túrde óteýge sottaldy. Sondai-aq, S. Ótegenov ádilet aǵa leitenanty, S. Saltaev ádilet kapitany shenimen qoshtasty. Olarǵa probatsiialyq baqylaý ornatylady.
D. Baitoriev 3 jylǵa bas bostandyǵynan aiyrý jazasyn qaýipsizdigi ortasha qylmystyq-atqarý júiesi mekemesinde óteidi. Ádilet leitenanty sheninen aiyryldy.
A. Kenjesh 3,5 jylǵa bas bostandyǵynan aiyrý jazasyn qaýipsizdigi ortasha qylmystyq-atqarý júiesi mekemesinde óteýge sottaldy. Kishi serjant sheninen aiyryldy.
Sottalýshylardyń bári de úsh jylǵa bilik ókili qyzmetin atqarý quqyǵynan aiyryldy.
Sot talqysynda málim bolǵanyndai, atalmysh mekemeniń ekinshi qabatyndaǵy №20 kamerada ótken jyldyń 27 aqpanynan 1 naýryzyna deiin osynda jazasyn óteýge kelgender Vitalii Ýkolov, Aleksei Kereev, Ivan Obrovets, Artem Traisov, Roman Ibatýllin, Maǵjan Túimaliev, Nikolai Boldyrev, Rýbek Seitkereev jáne Batyrhan Abdolla jatqan. 27 aqpan kúni saǵat 20:00-de baqylaýshy A. Tóleev jumysyna kirisip, túnde V. Ýkolovtyń uiyqtamai jatqanyn kórip, dóreki túrde eskertý jasap, sózge kelgen. Basqa jazasyn óteýshiler oianyp, tynyshtyqty buzǵany úshin A. Tóleevke sóilegen. Sodan keiin Tóleev Ýkolovtyń osy qylyǵy úshin «búkil kamera azap shegetinin» aitqan.
Tóleev 1 naýryz kúni kúndiz kezekshilikke kelip, bolǵan oqiǵany sottalýshylarǵa jetkizgen. Sol kúni Ótegenov, Tóleev jáne Kenjesh №20 kameradan jazasyn óteýshilerdi shyǵaryp, sapqa turǵyzyp, meditsinalyq-sanitarlyq bólimge qarai dálizben alyp júrgen. Sosyn qabyrǵa janyna turǵyzǵan. Kabinetke jazasyn óteýshilerdi kezekpen alyp kelip, olardy koloniia qyzmetkerleri uryp-soqqan. Aldymen V. Ýkolov taiaqqa jyǵylǵan, sodan keiin qalǵandaryna kezek kelgen. Koloniia qyzmetkerleri arnaiy qural - rezeńke taiaǵyn da qoldanǵan.
Sottalýshylar kinásin moiyndaǵan joq. Biraq, olardyń kinási tolyqtai dáleldendi.
Sonymen qatar, sot sottalýshylarǵa I. Obrovets pen M. Túimalievke 500 myń teńgeden, A. Traisovqa 1 mln teńge kóleminde moraldyq ótemaqy tóleýdi mindettedi. Al, V. Ýkolovtyń emdeý shyǵynyn talap etýge quqyǵy bar.
Sot úkimi zańdy kúshine engen joq.
