QR Bas prokýratýrasynyń resmi ókili Oksana Loskýtova Oral qalasyndaǵy túrmeniń qurylysyna bólingen 577 mln teńgeniń qoldy bolǵanyn málim etti, dep habarlaidy Baq.kz tilshisi.
«Oraldaǵy tergeý izoliatorynyń qurylysy barysynda biýdjet qarajatyn jymqyrý faktileri anyqtaldy. Qurylys materialdary men qurylǵylardy aýystyrý jáne olardyń baǵasyn joǵarylatý arqyly igerilgen 4,5 milliard teńgeniń 577 milliony qoldy bolǵan», - dedi ol.
Onyń aitýynsha, Oraldaǵy zań buzǵan adamdardyń sany 300-den aspaidy. Al shaharda salynyp jatqan tergeý izoliatory 1500 adamǵa arnalǵan.
Oksana Loskýtovanyń pikirinshe, mundai iri tergeý izoliatory Almaty, Qaraǵandy, Óskemen syndy qylmys deńgeii joǵary qalalarda salynýy kerek.
Keiin QR Bas prokýratýrasynyń resmi ókili Almaty oblysyndaǵy túrmeni jóndeýge bólingen qomaqty qarajattyń jymqyrylǵanyn atap ótti.
«Almaty oblysy Zarechnyi aýylyndaǵy túzeý koloniiasyn qaita jóndeýge 120 mln teńge qajet bolǵan. Alaida oryndalmaǵan jumys qabyldanǵany anyqtaldy. Jalpy nysan boiynsha materialdardyń, ári oryndalǵan jumystardyń quny 568 mln teńgege joǵarylatylǵan», - dedi ol.
Osy oraida resmi ókil mundai derekterdiń Astanada da tirkelgenin jetkizdi.
«Astana qalasy men Aqmola oblysyndaǵy kúzet mekemelerindegi kúrdeli qurylystaryn júrgizý kezinde biýdjettiń 210,5 mln teńgesi jymqyrylǵan. Jalpy mundai qylmystar úshin qylmystyq-atqarý júiesiniń 41 qyzmetkeri sottaldy», - dep túiindedi sózin Oksana Loskýtova.
