Oralda turǵyndar shaǵymynan keiin ózen men shaǵyn orman mańyna jol salýdy toqtatty. Ormanǵa jaqyn jatqan kóshe turǵyndary tamyz aiynan beri túrli memlekettik organdarǵa hat jazǵannan keiin qala ákimdigi jol salý týraly kelisimniń kúshi joiyldy dep habarlaǵan.
- Shaǵyn orman aýmaǵynda ainalma jol salynatynyn estigennen keiin únsiz qalmai, pikirimizdi aitý qajettigin, bilikke qairylý kerek ekenin túsindik. Jospar boiynsha, jol shaǵyn ormandy kesip ótedi, demek aǵashtar kesiledi degen sóz. Onyń ústine birneshe metr jerde Starichka ózeni aǵyp jatyr, ol Jaiyqqa quiady. Qurylys ózenge de ziian tigizýi múmkin, - dedi jergilikti turǵyn Natalia Kýdriavtseva.
Ótken aptada turǵyndar ákimdikten jol salynbaityny týraly hat alǵan. 20 qazanda turǵyndarmen kezdesý kezinde Oral ákiminiń orynbasary Ashat Kólbaev bul aqparatty rastap, qala ákimi Abat Shynybekovtiń jol salý týraly sheshimniń kúshin joiǵanyn atap ótti.
Oral qalasynyń turǵyn úi-kommýnaldyq sharýashylyq bólim qyzmetkerleri aldaǵy ýaqytta atalǵan aýmaqta jol salý jospary joq ekenin aitty.
Ainalma jol burynǵy bylǵary zaýytynyń ornynda bastalǵan qurylys alańymen shektesip jatyr. Jazda jeke kompaniia ol jerge kóp qabatty turǵyn úi sala bastaǵan. Qazir bilik sheshimimen qurylys toqtaǵan. Qurylystyń toqtaǵany jaily aqparat qyrkúiek aiynda belgili boldy. Ol kezde turǵyndar qurylys kompaniiasynyń ekologiialyq normalardy saqtamaitynyn aityp, shaǵymdanǵan bolatyn. Qurylys qaldyqtary shaǵyn ormanǵa tógilgen, al saraptama "las" dep tapqan topyraq qurylys aýmaǵy men ormanǵa jaiylǵan.
Qazir jergilikti turǵyndardyń qolynda ekologiialyq saraptamanyń nátijesi bar. Onda aýdan topyraǵynyń quramynda munai ónimderiniń kontsentratsiiasy, hlorid, sýlfattar men ózge de zattardyń shamadan asyp ketkeni jazylǵan.
Turǵyndarǵa bilik jibergen qujattardaǵy málimetke sáikes, qurylys kompaniiasy lastanǵan topyraqty 2020 jyldyń 31 jeltoqsanyna deiin ýtilizatsiialaýy qajet.
