"Svoi dom" kooperativiniń salymshylary kompaniia keńsesi aldynda tur. Oral, 10 jeltoqsan 2021 jyl.
Oralda "Svoi dom" turǵyn úi kooperativiniń 20-dan astam salymshysy 10 jeltoqsanda kompaniia keńsesine baryp, aqshalaryn qaitarýdy talap etti. Jinalǵandardyń sózine qaraǵanda, kooperativtiń keibir músheleri sotqa da júgingen. Keibiriniń qolynda kooperativti aqshany qaitarýǵa mindettegen sot sheshimderi bar. Kompaniia ókilderiniń aitýynsha, reabilitatsiia protsesi júrip jatqandyqtan, bul kezeńde tólem operatsiialary júrgizilmeidi, dep jazady Azattyq radiosy.
Jinalǵandardyń ókili, zańger Ýlfat Muqanovanyń aitýynsha, salymshylar orta eseppen 2-4 mln teńge aralyǵynda aqsha salǵan. Biraq arasynda on million teńgeden astam qarajat quiǵan azamattar da bar. Zańgerdiń sózinshe, ýáde etilgen baspanaǵa qol jetkize almaǵandar 50-den asady.
— 11 mln teńge jinaǵanbyz. Tirnektep jinaǵan aqshalardyń bárin saldyq, satatyn nárselerdiń bárin sattyq. Úi alǵymyz keldi. [Kooperativtegiler] úi tapsańyzdar, satyp alyp beremiz dedi. 16,5 mln teńge turatyn úi taptyq. Jarty aqshasyn jinadyq. 2019 jyly bolatyn. Qazir mundai baǵa joq. Satýshyǵa baryp, kelistik. Kooperativtegiler oǵan aldyn ala 1,5 mln teńge tólep qoiǵanyn aitty, – dedi salymshylardyń biri Azamat Taýbaev.
Salymshynyń sózine qaraǵanda, kooperativtegilerdiń ýádesine qaramastan satýshy sol kúii úidiń aqshasyn ala almaǵan. Sodan beri Azamat Taýbaev 11 mln teńgesin qaitarýǵa kúsh salyp keledi. Jartysyna jýyǵyn "daýlasyp júrip" qaitara alǵan.
— Kooperativke múshe árbir salymshy tańdaǵan baǵdarlamaǵa qarai alǵashqy jarnany tóleýi tiis: bireý 500 myń, bireý 600 myń tóleidi. Sosyn ai saiyn 30, 50, 60 myń teńgeden quiyp turǵan. Biraq kelisim-shartta bastapqy jarna qaitarylmaidy dep jazylǵan. Bul sot sheshiminde de bar. Qalai bolǵanda da kooperativ aqshasyz qalmaidy. Al salymshylar qaitarylǵan aqshaǵa úi ala almaidy. Onyń ózinde qaitarylsa deńiz, – dedi zańger Ýlfat Muqanova.
Onyń aitýynsha, salymshylar qiyn jaǵdaida qalǵan, sebebi jyljymaityn múlik quny keiingi kezde sharyqtap ketken. 2019 jyly salymshylardyń basym bóligi aqsha sala bastaǵan kezde Oralda bir bólmeli páter 6-7 mln teńge bolǵan. Qazir shamamen 12 mln teńge turady.
"Svoi dom" turǵyn úi kooperativiniń tóraǵasy - Gúlzara Erkenalieva
"Svoi dom" turǵyn úi kooperativiniń tóraǵasy Gúlzara Erkenalieva "qylmystyq is aiasynda qolhat bergendikten" túsinikteme berýden bas tartty. Qandai bap boiynsha jáne kimge qozǵalǵanyn da naqtylamady.
Onyń aitýynsha, salymshylar aqshany qaitarýdy jappai talap ete bastaǵandyqtan kooperativ azamattyq shaǵym túsirip, reabilitatsiiaǵa ýaqyt suraǵan. Sol sebepti kooperativ salymshylarǵa aqshalaryn qaitara almaidy dedi ol.
