Oral qalasynda sanitarlyq talaptardy buzǵan taǵy 10 nysan jabyldy, dep habarlaidy "Ult aqparat".
Oral qalasy taýarlar men qyzmetterdiń sapasy men qaýipsizdigin baqylaý basqarmasy on nysannyń qyzmetin toqtatý jóninde usynys berdi.
Munyń deni – dúkender. Atap aitqanda, M.Yqsanov kóshesinde «Frýktovyi sad», M.Mámetova kóshesinde «Chaplin» shashtarazy, «Alramin» jaryq shamdary dúkeni, N.Nazarbaev dańǵylynda «Rahat» ashanasy, Ábilqaiyr han dańǵylynda «Gyros» tez tamaqtaný kafesi, «Astana» shaǵynaýdanynda Barbershop «Blade», Iu.Gagarin kóshesinde «Kerýen», «Mir dverei», D.Nurpeiisova kóshesinde «Mir obývi» dúkenderi ýaqytsha jabyldy.
Basqarma basshysy Mádeniet Tanaýovtyń aitýynsha, arnaiy monitoring top músheleri kún saiyn tekserý jumystaryn júrgizýde. Sonyń nátijesinde atalǵan nysandarda dezinfektsiialyq zattardyń, antiseptik jetispeitini, qyzmetkerlerdiń maska, qolǵap kimeitini, basqa da sanitarlyq talaptardyń saqtalmaǵany anyqtaldy.
«Mamandar teksergennen keiin buzýshylyqtardy joiý jóninde biz nysandarǵa usynys beremiz. Nysan ieleri óz erikterimen saýda jáne qyzmet oryndaryn jabady. Sosyn kerekti qural-jabdyqtardy alyp, ázir bolǵan soń bizdiń mamandar baryp, tekserip, daiyndyq aktisin jasaidy. Sonyń negizinde qaita ashylady. Kúni búginge deiin barlyǵy 21 nysan jabylsa, buzýshylyqtardy retke keltirgen 11-i qaitadan óz qyzmetterine kirisip jatyr», dedi QazAqparat tilshisine M.Tanaýov.
