Oralda jol-kólik oqiǵasyn videoǵa túsirgen bloger ustaldy, dep habarlaidy "Ult aqparat".
Aibolat Bókenovtiń aitýynsha, keshe Jáńgir han kóshesi men E.Brýsilovskii kósheleri qiylysynda bolǵan jol-kólik oqiǵasyn videoǵa túsirgen.
Onyń sózine qaraǵanda, «politsiia avtokóligi qyzdy qaǵyp ketti» degen habar kelgennen oqiǵa ornyna jetken.
«Osyǵan bailanysty departament bastyǵy Maqsuthan Ablazimovtan pikir surap edim. Ol videoǵa túsirme dep, smartfonymdy tartyp alyp, «videony joiyńdar» dep qasyndaǵy qyzmetkerge berdi. Sosyn «ustap, tekserińder» dedi. Sodan keiin narkologiialyq dispanserge apardy. Onda jeńil dárejede ishimdik ishken degen qaǵaz berdi. Syra ishkenim ras. Sodan keiin Zachagan politsiia bóliminde úsh saǵat ustap, QR Ákimshilik quqyqbuzýshylyq kodeksiniń 667-babyna sáikes (politsiia qyzmetkerlerine baǵynbaǵany úshin) ákimshilik hattama toltyrdy. Keiin telefonymdy aldym», deidi A.Bókenov.
Osy oqiǵaǵa bailanysty BQO politsiia departamenti óz pikir-paiymyn bildirdi.
Departamenttiń baspasóz qyzmeti taratqan málimdemege qaraǵanda, A.Bókenov oqiǵa ornyna kelgende, politsiia qyzmetkerleri tergeý amaldaryn júrgizip jatqan. A.Bókenov óz is-áreketterimen buǵan kedergi keltirgen. Videoǵa túsiremin dep jolǵa da birneshe ret shyǵyp, qaýpsizdik talaptaryn saqtamaǵan. Politsiia qyzmetkerleri birneshe ret eskertý jasaǵanymen, ony tyńdamaǵan. Sondyqtan ony bógeýge týra kelgen.
Meditsinalyq kýálandyrý qorytyndysyna sáikes A.Bókenov jeńil dárejede mas kúiinde bolǵan.
«A.Bókenovtiń qoǵamdyq orynda osylai júrýi birinshi ret emes. Ol sońǵy úsh jylda birneshe ret ákimshilik jaýapkershilikke tartylǵan», dedi departamenttiń baspasóz qyzmeti.
Eske sala keteiik, budan buryn Oralda politsiia avtokóliginiń 21 jastaǵy qyzdy qaǵyp ketkenin jáne keiin politsiia qyzmetkerine qatysty qylmystyq is qozǵalǵanyn jazǵan bolatynbyz.
