Oral qalasynda esirtkilik zattardy saqtady degen kúdikpen kolledj stýdenti ustaldy, dep habarlaidy "Ult aqparat" QR Ishki ister ministrligine silteme jasap.
«Onyń turǵylyqty jerin tintý barysynda bólshektep salynǵan «Alfa PVP» sintetikalyq esirtki zaty jáne gashish tabyldy. Odan esirtki zattarynan bólek, birneshe uialy telefon, banktik kartalar, elektrondy tarazy jáne býyp-túiýge arnalǵan materialdar alyndy», - dedi ministrlikten.
Tergeý barysynda belgili bolǵanyndai Oraldyń 19 jastaǵy turǵyny tanymal messendjer arqyly esirtki saýdasyn uiymdastyrǵan. Satýǵa arnalǵan esirtkini internet arqyly tapsyrys berip, ony júzbe-júz kezdesýdi qajet etpeitin jolmen alyp otyrǵan. Sodan keiin esirtkini óz páterinde bólip, býyp, belgili bir jerge jasyryp ketý arqyly taratqan.
Kúdiktiniń telefonynan esirtki jasyrylǵan barlyq mekenjailar, geobelgiler jáne fotolar alyndy. Sońǵy eki aida Oral jáne Aqtóbe qalalarynda barlyǵy 50-ge jýyq jasyrylǵan oryn anyqtalǵan.
«QR QK-niń 296-baby 4-bóligi boiynsha (esirtki zattardy, psihotropty zattardy ótkizý maqsatynda zańsyz daiyndaý, qaita óńdeý, alý, saqtaý, tasymaldaý, jóneltý nemese ótkizý) sotqa deiingi tergeý bastaldy. Qazirgi ýaqytta esirtkini belgili bir orynǵa jasyryp ketý fýnktsiiasyn júzege asyrǵan tulǵalardy anyqtaý, dáleldemelik bazany bekitý jáne QR QK-niń 297-babynyń 4-bóligi boiynsha (esirtkini elektrondy aqparattyq resýrstardy paidalaný arqyly ótkizý) jańa aiyp taǵý úshin tergeý-jedel is-sharalary júrgizilýde», - dedi vedomstvodan.
Eske sala keteiik, 11 qańtarda esirtkini elektrondy aqparattyq resýrstardy paidalaný arqyly ótkizgeni úshin jaýapkershilikti kózdeitin qylmystyq zańanamadaǵy ózgerister kúshine endi. Endigide bul qylmys úshin múlkin tárkileýmen 10 jyldan 15 jylǵa deiin bas bostandyǵynan aiyrý kózdeledi.
