Oralda Semeiden eki jasar úlyn alyp ketpek bolǵan Aqerke Qozykeshovany bireýler óltirip ketken, - dep habarlaidy "Ýralskaia nedelia".
Basylymnyń málimetinshe, kelinshekti óziniń qaiyn atasy óltirdi degen kúdik bar.
"Aqerkeni máiithanada kórgende tanymai qaldyq. Betinen bet qalmaǵan - uryp-soqqan, basynda da jaraqattar bar, denesi kógergen, keýdesine pyshaq salynǵan. Sot-meditsinalyq saraptama Erkeniń qabyrǵalary synǵanyn kórsetti", - deidi qaitys bolǵan qyzdyń týysy.
Týystarynyń aitýynsha, olar kúieýimen 2015 jyly tanysyp, otbasy qurǵan. 2016 jyly otbasynda ul dúniege kelgen. Al 2017 jyldyń qazanynda Aqerke pyshaq jaraqattarymen aýrýhanaǵa túsken. Qyz sol kezde ony kúieýi jasaǵanyn aitqan. Biraq keiinirek bul is jabylǵan.
Erli-zaiypty 2018 jyldyń aqpanynda ajyrasqan. Kelinshek ulymen birge Semeige ketip qalǵan. Artynsha kúieýi kelip ulyn áketken. Sodan 6 sáýirde Aqerke Oralǵa kelip, hostelde toqtaǵan. Sońǵy ret 8 sáýirde týystarymen bailanysqa shyqqan.
"Kúieýine eki kún boiy qońyraý soqqan. Ol 8 sáýirde balany ózim ákelemin dep ýáde bergen. Aqerke saǵat 2-de hostelden shyqqan. Sol kúni saǵat 5-te BQO IID-ne kelinshektiń qaiyn atasy kelip, kelinine balany bermeý úshin ony pyshaqtaǵanyn aitqan", - deidi qaitys bolǵan kelinshektiń týysy.
BQO IID ókilderi QR Qylmystyq kodeksiniń 99-baby boiynsha qylmystyq is qozǵady.
