Jaqynda Batys Qazaqstan oblysynda IT HUB halyqaralyq tehnoparki ashyldy. Ortalyq «Tsifrlyq Qazaqstan» memlekettik baǵdarlamasyn júzege asyrý maqsatynda jumys jasamaq.
Atalǵan tehnopark óńirdegi tsifrlyq aqparattyń keń taraýyna yqpal etip, jergilikti jas daryndardyń óz ideialaryn júzege asyrýǵa járdemdesedi.
IT-qaýymdastyqtyń aitýynsha, jahandyq tehnologiialyq alań ekonomikanyń damýyn jedeldetedi ári turǵyndardyń turmys sapasyn túzeýge qol ushyn sozady.
«Bizdiń maqsatymyz – biryńǵai ekojúieni 2 jyl ishinde qurý. IT HUB oblystaǵy innovatsiiany damytatyn qozǵaýshy kúsh bolýy qajet. Tehnopark alańynda úsh negizgi qatysýshy bar. Olar: memleket, biznes jáne qoǵam. Qoǵam qajettilikti týdyrady, memleket maqsattar men mindetterdi qoiady, al biznes bolsa, ómir sapasyn arttyrý úshin belgili bir isterdi jasaidy», – deidi IT-qaýymdastyq ókili Igor Kochetkov.
Oblys ákimi Altai Kólginov tehnoparktiń ashylýyna qatysyp, «Tsifrlyq Qazaqstan» memlekettik baǵdarlamasy boiynsha atqarylyp jatqan jumystarǵa toqtalyp ótti.
«Men bizdiń IT-kompaniialarǵa alǵys aitqym keledi. Ótken jyly modernizatsiialaýǵa jáne jetilýge bailanysty birqatar tapsyrmalar alǵa qoiyldy. Bizdiń túpki maqsatymyz – azamattardyń memlekettik qyzmetti sapaly alýy. Sondai-aq, bul mindetter Elbasynyń «Tsifrlyq Qazaqstan» baǵdarlamasynda kózdelgen. QR Prezidenti de halyqpen keri bailanysty kúsheitý kerektigin, bári ashyq bolýyn tapsyrǵan bolatyn. Bul jobalar bizde bastalyp ta ketti», – deidi óńir basshysy.
Qazirgi tańda BQO-da tsifrlandyrý baǵyttary boiynsha 140-tan astam joba júzege asyrylý ústinde. Búginde túrli salalar boiynsha tsifrlandyrý jumystary jappai qolǵa alynyp, óz nátijelerin kórsete bastady. Oǵan mysal retinde, densaýlyq saqtaý salasyndaǵy aýqymdy jumystardy aitsaq bolady. Iaǵni, patsientterdiń meditsinalyq kartochkalary elektrondy formatqa kóship, dárigerler emdelýshilerge kóp ýaqytyn bóle alatyn deńgeige jetti. Sondai-aq, qaladaǵy barlyq emhanalarda elektrondy kezek kútý júiesi paida boldy.
