27 qazan kúni Batys Qazaqstan oblystyq qazaq drama teatrynda Qazaqstan táýelsizdiginiń 25 jyldyǵyna arnalǵan aqyn-dramatýrg, Memlekettik syilyqtyń laýreaty, halyqaralyq «Alash» jáne táýelsiz «Tarlan» syilyqtarynyń iegeri Iran-Ǵaiyptyń (Iranbek Orazbaev) «Máńgilik eldiń altyn adamy» atty respýblikalyq teatrlar festivali márege jetti, dep habarlaidy QazAqparat.
Iran-Ǵaiyptyń óner keshinde aldymen aqynnyń ózi óleńderin oqyp, osyndai teatr festivalin uiymdastyryp, oǵan qoldaý kórsetken Batys Qazaqstan oblysy basshylyǵyna, Aq Jaiyq jurtshylyǵyna alǵysyn bildirdi. Kesh barysynda Almatydan arnaiy kelgen saksofonshylar, aqyn-dramatýrgtiń uly Jaiynshah pen onyń ustazy Konstantin Dobrovolskii, qaryndasy Raia Orazbaeva men jieni, belgili estrada ánshisi, «Túrkvijn-2014» halyqaralyq festivaliniń jeńimpazy Janar Duǵalova, sondai-aq Batys Qazaqstan oblystyq qazaq drama teatrynyń ártisteri, Qazaqstannyń eńbek sińirgen qairatkeri Erbol Esendosov, teatr direktory Qýanysh Amandyqov óz ónerlerin kórsetti.
«Meniń teatrmen bite-qainasyp ketkenime jiyrma jyldan asty. Qazirgi bar jubanysh-qýanyshym teatr dese de bolady. Oralda alty kúnniń ishinde on týyndym qoiylyp, Qazaqstan táýelsizdiginiń 25 jyldyǵy qarsańynda shyǵarmashylyǵymnyń bir kezeńine esep bergendei boldym. Sol úshin osy festivalge qatysqan barlyq teatrǵa, bizdi qushaq jaiyp, qarsylaǵan Aq Jaiyq eline rizamyn», dedi Iran-Ǵaiyp.
Kesh sońynda oblys ákiminiń orynbasary Marat Toqjanov Iran-Ǵaiyp bastaǵan festival qonaqtaryna, qatysýshylarǵa alǵysyn bildirdi.
Qazylar alqasynyń sheshiminen Batys Qazaqstan oblystyq qazaq drama teatry sahnalaǵan «Máńgilik eldiń altyn adamy» spektakli «Eń úzdik qoiylym» dep tanyldy. Onyń rejisseri, belgili teatr jáne kino akteri, Qazaqstannyń eńbek sińirgen ártisi, «Qurmet» ordeniniń iegeri Murat Ahmanov «Úzdik rejissýra» atalymyn ielendi. Ǵ.Músirepov atyndaǵy qazaq memlekettik akademiialyq balalar men jasóspirimder teatrynyń aktrisasy Aqbota Qaimaqbaeva «Fatima» spektaklindegi Fatima, batysqazaqstandyq teatrdan Nurlygúl Jubatova «Máńgilik eldiń altyn adamyndaǵy» Qazyna róli úshin «Úzdik áiel beinesi», Abai atyndaǵy Semei memlekettik qazaq mýzykalyq drama teatrynyń akteri Baýyrjan Tólekov «Adasqan baq qusyndaǵy» Keriketkendi sheber somdaǵany úshin «Úzdik er adam beinesi» atalymymen marapattaldy. Oǵan qosa bir top teatr rejisser-akterleri «Táýelsizdikke taǵzym», «Máńgilik el» atalymdary boiynsha atalyp ótildi. Olardyń ishinde BQO teatrynyń bas rejisseri Muqanǵali Tomanov, beldi akterleri Serdesh Qajymuratov, Musaǵali Bektenov, Erbol Esendosov, sýretshisi Qaiyr Orazǵaliev bar.
