10 mamyr kúni keshkilik Oral qalasyndaǵy «Qurylysshy» shaǵynaýdanynda kópqabatty úilerdiń birinde qaiǵyly oqiǵa boldy, dep habarlaidy QazAqparat tilshisi.
Oblystyq densaýlyq saqtaý basqarmasynyń baspasóz hatshysy Ainagúl Saqposynovanyń aitýynsha, oqiǵa ornyna jedel járdem saǵat 20.24-te shaqyrylyp, olar úsh minýttan keiin jetken.
«Oq tigen 60 jastaǵy áiel jedel járdem kelgenge deiin kóz jumǵan. Ishinen oq tigen 1951 jylǵy er adam qalalyq kópbeiindi aýrýhanaǵa jetkizildi. Oǵan túnde ota jasaldy. Ota alty saǵatqa sozyldy. Jaǵdaiy aýyr», - dedi A.Saqposynova.
Oqiǵa kýágerleriniń sózine qaraǵanda, jas adam enesin atyp óltirgen. Qaiyn atasyna da oq tigen.
"Kúieý balasy enesin atyp tastady, ol qaitys boldy. Sosyn qaiyn atasyn atty. Ol tiri, jedel járdem alyp ketti. Men olardyń "Kómektesińizder, kómektesińizder" degen aiqailaǵan daýystaryn estidim. Osy kezde dúkenge bara jatqan edim. Syrtta ájeler turǵan. Olarǵa jastardy shaqyrýyn, áielge kómektesý kerektigin aittym. Oq atylǵan sátti de estidik", - deidi úidiń turǵyny Mariia Ameliakina.
Qazirgi kezde oqiǵanyń jai-japsary anyqtalyp jatyr.
