Oral qalasynda demalys kúnderi UBT tapsyratyn túlekter úshin tasymal uiymdastyrylady. Bul týraly brifingte BQO bilim basqarmasy basshysynyń mindetin atqarýshy Záýre Ǵumarova málim etti, dep habarlaidy "Ult aqparat".
Onyń atap ótkenindei, BQO bas memlekettik sanitar dárigeriniń 23 maýsymdaǵy qaýlysyna sáikes óńirde qosymsha shekteý sharalary engizilgen bolatyn.
Sonyń ishinde 27-28 maýsym kúnderi Oralda qoǵamdyq kólikter júrmeidi.
«Osyǵan bailanysty demalys kúnderi M.Ótemisov atyndaǵy Batys Qazaqstan memlekettik ýniversiteti men Jáńgir han atyndaǵy Batys Qazaqstan agrarlyq-tehnikalyq ýniversitetinde synaq tapsyratyn talapkerlerdi tasymaldaýǵa 16 avtokólik bólindi. Sonymen qatar qalaǵa keletin Báiterek, Tasqala, Terekti aýdandary túlekterin 74 avtokólik jetkizedi. Al qalanyń shetkeri aýmaqtarynda turatyn túlekter basqa kúnderi tapsyrady. Olardyń árqaisysy úshin kólik qarastyrylady», dedi Záýre Bazarǵaliqyzy.
Qazirgi tańda oblysta UBT 9 testileý pýnktinde ótip jatyr. Oǵan barlyǵy 5062 úmitker qatysýǵa ótinish berse, 22 maýsymnan bergi tórt kúnniń ishinde 2041-i synaq tapsyrdy. 22 túlek UBT tapsyrýdan óz erkimen bas tartty. 14 úmitker tyiym salynǵan zattardy alyp ótpek bolǵany úshin testileýge jiberilmedi. Taǵy 10-y UBT erejelerin buzǵany úshin test tapsyrý múmkindiginen aiyrylyp, nátijeleri joiyldy.
Z.Ǵumarovanyń sózine qaraǵanda, 3 shildede márege jetetin UBT-daǵy baqylaý kúsheitilgen. Úmitkerlerdi táýelsiz sarapshylar qadaǵalaidy. Olardyń quramyna arnaiy monitoringtik toptar músheleri, qoǵam qairatkerleri, úkimettik emes uiymdar, sybailas jemqorlyqqa qarsy qyzmet jáne «Adaldyq alańy» jobalyq keńsesiniń ókilderi kirdi.
«Biylǵy 25 tamyzǵa deiin ár aýditoriiadan alynǵan beinejazbalardy mamandar zerdeleidi. Eger beinematerialdardy taldaý kezinde erejelerdi buzý anyqtalsa, talapkerdiń test nátijeleri joiylady. Eger sol kezde qatysýshyǵa grant taǵaiyndalǵan bolsa, onda ol granttan aiyrylady. Sondyqtan shpargalka daiyndaýdyń qajeti joqtyǵyn, tyiym salynǵan zattardy ákelmeý kerektigin taǵy da eskertemiz», dedi Záýre Ǵumarova.
BQO bilim salasyndaǵy sapany qamtamasyz etý departamentiniń basshysy Gúlnár Sársenǵalieva óńirdegi testileý pýnktterinde monitoring júrgizý nátijesinde sanitarlyq-epidemiologiialyq talaptardy buzýshylyqtyń anyqtalmaǵanyn jetkizdi.
«Synaqqa jiberilmegen nemese erejeni buzǵany úshin test tapsyrý múmkindiginen aiyrylǵandar biyl qańtardaǵy UBT-ǵa qatysqandyǵy týraly sertifikaty bolǵan jaǵdaida aqyly túrde elimizdegi JOO-larǵa qujat tapsyra alady. Sol sekildi óziniń ornyna basqa adamdy kirgizgen talapker de bir jyl boiy UBT-ǵa qatysa almaidy. Biyl oblysta mundai buzýshylyq oryn alǵan joq. Óz jaýabynyń durystyǵyn dáleldegisi keletin túlekter UBT nátijeleri habarlanǵannan keiin kelesi kúngi saǵat 13.00-ge deiin apelliatsiialyq komissiiaǵa ótinish túsire alady. Komissiia ony sol túlektiń qatysýymen bir kúnniń ishinde qarastyrady», dedi G.Sársenǵalieva.
