Oral qalasynda kúishi-kompozitor Dáýletkerei Shyǵaiulynyń 200, asa kórnekti oryndaýshy Naýsha Bókeihanovtyń 150 jyldyǵyna arnalǵan «Kúmbirlegen kúmis kúi» atty respýblikalyq dombyrashylar baiqaýy ótedi, dep habarlaidy "Ult aqparat".
BQO ákimdigi jáne mádeniet basqarmasynyń qoldaýymen oblystyq halyq shyǵarmashylyǵy ortalyǵy uiymdastyryp otyrǵan baiqaý 27-28 qazan kúnderi Jastar mádeniet saraiynda bolmaqshy.
Atalmysh ortalyq direktory Máýlet Jubatovtyń aitýynsha, kúi saiysy úsh kezeńnen turady. Onda dombyrashylar Dáýletkerei, Naýsha jáne Qurmanǵazynyń kúilerin oryndaidy. Baiqaýdyń alǵashqy eki kezeńinde dombyrashylar jeke kúi tartsa, sońǵy syn dirijer, kompozitor, «Daryn» jastar memlekettik syilyǵynyń laýreaty Erkin Nurymbetov jetekshilik etetin Ǵ.Qurmanǵaliev atyndaǵy oblystyq filarmoniianyń Dáýletkerei atyndaǵy ult aspaptar orkestriniń qatysýymen ótedi.
Dáýlesker kúishi Dáýletkerei Shyǵaiuly men Naýsha Bókeihanovtyń esimderin ulyqtaý maqsatynda uiymdastyrylǵan baiqaýǵa Almaty, Atyraý, Qyzylorda, Mańǵystaý oblystarynan, sondai-aq Oral qalasy men Batys Qazaqstan aýdandarynan barlyǵy 18 úmitker qatysyp, baq synamaqshy. Olardyń ónerin elge tanymal kúishilerden quralǵan qazylar alqasy baǵalaidy.
Aita keteiik, Bókei handyǵynda dúniege kelgen Dáýletkerei Shyǵaiuly (1820-1887) – názik lirizmge toly tóre kúileriniń negizin qalaǵan halyq kompozitory. Al Naýsha Bókeihanov (1870-1944) Dáýletkereidiń murasyn keiingi urpaqqa jetkizdi. Sonymen qatar ol qazaq ulttyq halyq aspaptary orkestriniń negizin qalaýshylardyń biri retinde tarihta qaldy.
