Oralda qalalyq saiabaqtaǵy átkenshekten qulaǵan balalardyń jaǵdaiy belgili boldy, dep habarlaidy "Ult aqparat".
BQO densaýlyq saqtaý basqarmasynyń baspasóz qyzmeti málim etkenindei, qalalyq mádeniet jáne demalys saiabaǵynda keshe bolǵan oqiǵa saldarynan 8 bala zardap shekti.
«Balalar kóptegen dene jaraqattaryn alǵan. Jedel járdem olardy oblystyq kópbeiindi aýrýhanaǵa jetkizdi. Dárigerler qaraǵannan keiin balalardyń miy shaiqalmaǵan jáne synyq jaraqattaryn almaǵan bolyp shyqty. Bári de meditsinalyq kómek kórsetilgennen ambýlatorlyq em alýǵa jiberildi», dep habarlady vedomstvodan.
Keiin belgili bolǵanyndai, attraktsionnyń isten shyǵýyna bailanysty qatty jyldamdyqpen ainalyp turǵan átkenshek kilt toqtap qalyp, balalar sodan jaraqat alǵan.
BQO politsiia departamenti osy oqiǵa bailanysty attraktsion iesine qatysty QR QK 306-baby 2-bóligine (qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetter kórsetý) sáikes qylmystyq is qozǵalǵanyn jetkizdi.
Eske sala keteiik, budan buryn Oralda qalalyq saiabaqtaǵy attraktsionnan 8 bala qulap ketkenin jazǵan bolatynbyz.
